JKNS ngenukuka Kluster Jalan Pengiran nadai agi
KUCHING: Kluster Jalan Pengiran, Matu ditetapka nadai agi, ku Sekretariat Komiti Mutarka Penusah Ngenyit Nengeri Sarawak (JPBNS).
"Sehari tu (Kemari), Opis Pengerai Nengeri Sarawak (JKNS) udah netapka Kluster Jalan Pengiran, Matu Bagi Menua Mukah nadai agi (tamat) pengudah nadai kes baru ditemu bekaul kluster tu.
"Kluster Jalan Pengiran ditetapka kena 31 Januari 2021 enggau kes kepenudi bekaul enggau kluster tu ditemu kena 10 Februari 2021.
"Bisi 326 individu udah diperesa lalu ari penyampau nya bisi 24 kes ditemu positif COVID-19 nyenkaum kes indeks enggau 302 individu negatif," ku JPBNS nengah penerang berita, kemari.
Nya alai naka kemari bisi 26 kluster COVID-19 agi aktif sereta ari penyampau nya (kemari) bisi tujuh kluster ti ngerikod nambah kes sereta 19 kluster bukai nadai nambah kes.
Entara kluster ke bisi nambah kes kemari baka Kluster Kiba, Sibu bisi nambah tiga kes ti nyadika penyampau semua bisi 36 kes; Kluster Bukit Tunggal, Julau nambah 4 kes kemari ti nyadika penyampau semua 40 kes;
Kluster Jalan Muhibbah, Betong kemari nambah 19 ti nyadika penyampau semua bisi 287 kes; Kluster Emperoh Jambu, Kuching (nambah dua kes, semua nyadi 264 kes); Kluster Sungai Bakong, Meradong (nambah semilan kes, semua nyadi 193 kes).
"Kluster Jalan Green, Kuching bisi nambah siti kes sehari tu ti nyadika penyampau semua nambah nyadi 31 kes.
"Kluster Gelong, Kapit sehari tu nambah empat kes ti lalu ngujungka penyampau semua nyadi 240 kes," ku JPBNS.
Kelimpah ari nya, kluster bukai baka Kluster Melor, Pusa; Kluster Jalan Awang, Sibu; Kluster Buloh, Selangau; Kluster Jalan Ho Pin, Samarahan; Kluster Kampung Sungai Maong, Kuching; Kluster Kejatau, Sri Aman; Kluster Jan Yong, Kapit; Kluster Geronggang, Sibu; Kluster Mas Merah, Sibu; Kluster Univista, Samarahan; Kluster Kidurong Dua, Bintulu; Kluster Nanga Lijan, Julau; Kluster Seruas, Beluru; Kluster Sebangkoi, Sri Aman; Kluster Jun Heng, Bintulu; Kluster Bintang Daily, Meradong; Kluster Tabong, Bau; Kluster Rakut, Miri; Kluster Pasai, Sibu enggau Sub-Kluster Tangap (Subis) nadai ngerikotka penambah kes kemari.