Terabai menua, komuniti enda patut irau pasal tuchuk vaksin COVID-19
BINTULU: Pengereja pengawa rintai mua enggau komuniti enda patut irau nerima tuchuk vaksin laban pengawa tu kena nentuka diri empu nyengkaum ruang bilik sereta orang ti ngelingi nya likun lalu mega ulih mutuska rentayan COVID-19.
Ketuai Polis Pelilih Menua Bintulu, Superintendan Zulkipli Suhaili madah nadai pekara ti ngirauka bekaul pengawa meri vaksin laban tu kena nentuka diri empu enggau diri sebilik gerai sereta seruran likun.
“Pengereja pengawa rintai mua enggau komuniti enda ibuh irau, ba aku pengawa betuchuk ti disereta aku bejalai enggau manah lalu enda ngirauka sekali,” ku iya lebuh ti ditemu ba Program Vaksinasi COVID-19 di tu bedau lama ti udah.
Iya ti mega pemesai raban ti bekuasa pengelikun keterubah Polis Diraja Malaysia (PDRM) Bintulu enggau pengari rayat sereta ketuai ejensi opis perintah ti nerima tuchuk vaksin Pfizer-BioNTech ari Opis Menteri Pengerai Malaysia (KKM) nengah Opis Pengerai Bagi Menua Bintulu.
“Ba penemu aku, program vaksinasi tu endang pengawa ti manah lalu program betuchuk vaksin tu bejalai enggau manah,” ku iya.
Berindik ari nya, Zulkipli minta raban pengereja pengawa rintai mua ngambika enda irau nerima tuchuk vaksin kena nentuka diri empu sereta diri sebilik seruran gerai.
“Aku mega andal nerima tuchuk vaksin tu lalu nya ngasuh aku ransing lalu nentuka diri empu terus gerai.
“Semua udah nemu raban rintai mua tu ngaul PDRM, Raban Soldadu Malaysia (ATM) enggau ejensi ti bekuasa lalu kitai begulai enggau komuniti sama nentuka COVID-19 ulih dipunaska kelebih agi ba Bintulu,” ku iya.