COVID-19:168 kes baru positif dirikod di Sarawak kemari

KUCHING: Penyampau semua kes COVID-19 di Sarawak naka kemari bisi 11,878 kes nyengkaum 168 kes baru positif.

Sekretariat Komiti Mutarka Penusah Ngenyit Nengeri Sarawak (JPBNS) madah, 168 kes baru positif nya dirikodka di Sarawak ke alai ba Pelilih Menua Sibu (49), Bintulu (37), Miri (19), Betong (19), Kuching (12), Kapit (10), Meradong (10), Bau (4), Julau (4), Mukah (3) enggau Limbang (1).

"Ari 168 kes baru diripotka nya, semina 13 iku tauka 7.74 peratus ti bisi ngayanka kelai rampit COVID-19 maya diperesa.

"Lalu ari 168 kes baru nya mega nyengkaum 42 kes asil ari meresa individu dalam kluster ke udah bisi (nadai tanda); 92 kes asil ari meresa individu ti bisi kontak semak ngagai kes positif COVID-19 (7 bisi tanda); enam kes asil meresa individu bisi tanda ba fasiliti pengerai; 26 kes ari beperesa bukai ba fasiliti pengerai (nadai tanda); siti kes bekaul enggau individu ti datai tauka pulai ari menua luar (Import A) iya nya ari menua Lubnan enggau siti kes bekaul enggau individu pulai ari Selangor dikategori kes Import B," ku JPBNS nengah penerang berita, kemari.

Nambahka nya JPBNS kemari ngeripotka bisi 264 kes baru udah gerai sereta dikemendarka pansut ari Sepital Sibu (141), Sepital Besai Sarawak (55), Sepital Bintulu (21), Sepital Sarikei (17), Sepital Miri (12), PKRC Betong (11), PKRC Sepital Kapit (6) enggau PKRC Sri Aman (1).

"Tu nyadika penyampau semua kes positif COVID19 ke udah gerai sereta dikemendarka pansut ari sepital nambah nyadi 9,388 iku tauka 79.04 peratus ari penyampau semua kes COVID-19 di Sarawak," ku JPBNS.

Penyampau kes aktif ti agi diperubat sereta diserara ba PKRC enggau wad sepital bisi 2,360 iku.

Ari penyampau nya (2,360 iku) bisi 857 kes ba Sepital Sibu enggau PKRC di Sibu; 374 kes ba Sepital Miri enggau PKRC Miri; 313 kes ba Sepital Bintulu enggau PKRC Bintulu: 271 kes ba Sepital Besai Sarawak enggau PKRC Kuching; 195 kes ba Sepital Betong enggau PKRC Betong.

Bisi 184 kes ba Sepital Kapit enggau PKRC di Kapit; 127 kes ba Sepital Sarikei enggau PKRC Sarikei; 18 kes ba Sepital Sri Aman enggau PKRC Sri Aman; 13 kes ba PKRC Mukah, tujuh kes ba PKRC Serian enggau siti kes ba Sepital Limbang ke agi diperubat sereta diserara ba wad.

Kemari bisi 178 PUI baru udah diripotka enggau siti PUI ti agi nganti pemutus peresa makmal.