Anang nyaup orang ti berimba kampung nadai pemendar
KANOWIT: Opis Kampung nengeri minta komuniti di nengeri tu kelebih agi ba kandang Sungai Batang Rajang, ngambika anang bisi kaul enggau pengawa orang ti berimba kampung nadai pemendar sereta mai kayu nya pansut.
Direktor opis nya, Datu HamdenMohammadmadahka ukum deka ditinggang ngagai individu tauka kompeni nyema ditangkap sereta ditemu amat bisi ngereja penyalah nya.
Ku iya, tu berindik ari pengawa ngenanka 312 mayuh bengkah saiz enggau bansa lumpung kayu, ti dipelabaka ngembuan rega royalti sepenyampau RM25,000, maya operasyen begulai ti dipejalaika opis nya enggau Pasukan Gerak AM (PGA) semak Nanga Semaram ditu, kena Hari Tiga tu tadi.
"Dalam operasyen ti dipejalaika pukul 8 pagi nya, lumpung kayu nya udah dirakit lalu diirit orang ti nebang kayu nadai pemendar nya nengah Sungai Batang Rajang, ke alai lumpung kayu nya ditemu nadai kelai dikemendarka ari JHS.
"Pengawa mai kayu dipejalaika orang ti nebang kayu nadai pemendar ba kandang Sungai Batang Rajang nengah bantu ari komuniti dia ke ngirit sereta nyaga lumpung kayu ti udah dirakit nya ngena perau mit," ku iya madah ba penerang berita kemari.
Hamden madahka pemujur ngerampas lumpung kayu nya ketegal pengeregas enggau pengawa matau belama ti dipejalaika opis nya ba kandang menua Sungai Batang
Rajang.
Ku iya, kes nya deka dipansik ari baruh Seksyen 96(1) Ordinan Kampung 2015 (Chapter 71) ti meri ukum minimum RM25,000 enggau maksimum RM150,000 tauka diukum jil enda ngelui lima taun tauka kededua nya sekali enti amat ditemu salah.
"Enti penyalah nya ditandu baru, sida deka diukum enda kurang ari RM150,000 tauka maksimum RM500,000 tauka diukum jil enda ngelui sepuluh taun tauka kededua nya.
"Kes nya mega deka dipansik ari baruh Seksyen 97(a) ordinan ke sama ti meri ukum bedabal nyema ditemu salah,"ku iya.
Iya mega meransang mensia mayuh meri pemadah ngagai opis nya nyema bisi tetemuka pengawa berimba kampung nadai pemendar.