Bisi 66 peminta BPBP udah dikemendarka dalam taun 2020
KUCHING: Bisi 66 peminta Bantu Pesakit Tungkul Sengayuh (BPBP) dalam taun 2020 udah dikemendarka seretabegunakabelanjasepenyampau RM420,452.00.
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah madah BPBP nya sebengkah inisiatif Perintah Nengeri Sarawak ti dipejalaika nengah opis menteri iya.
Inisiatif perintah nengeri nya dikena mantu ngelempungka penanggul belanja pesakit tungkul sengayuh di Sarawak ti ti deka berubat kena ngubat penyakit tu, ku iya.
"Ba taun 2020 bisi 66 peminta Bantuan Pesakit Buah Pinggang (BPBP) udah dikemendarka ti begunka belanja sepenyampau RM420,452.00.
"Naka bulan Februari 2021, Opis Pengintu Pengelantang Pendiau Raban Bansa Sarawak udah nerima sepenyampau 27 peminta, lalu ari penyampau nya bisi 13 peminta udah dikemendarka enggau belanja sepenyampau RM 379,080.00.
"Pom peminta (BPBP) tau diambi ba Opis Pengintu Pengelantang Pendiau Raban Bansa, Opis Residen enggau Pelilih Menua, sereta sepital enggau klinik perintah. Pom ke udah tembu diisi lalu disempulang dokumen sukung patut dianjung ngagai Opis Pengintu Pengelantang Pendiau Bagi Menua (PKMB)," ku iya.
Fatimah madahka pekara nya nengah sebengkah penerang berita nyerumba Hari
Tungkul Sengayuh Dunya, kemari.
Ngenang BPBP nya, iya madahka bantu nya nyengkaum bantu klinikal baka masang Arteriovenous Fistula (AVF); tuchuk Erythropoietin (EPO);perubat Hemodialisis enggau Continuous Ambulatory Peritoneal Dialysis (CAPD).
Nambahka nya BPBP mega nyengkaum bantu sukung baka bantu mesin, perengka pengangkut enggau bantu transplan.
"Bantu mesin nya bekaul enggau alai engkah mesin hemodialisis ba palan perubat aja, lalu lebih dikemeratka ba palan perubat perintah sereta enda nyengkaum ungkus ngemanahka mesin," ku iya.
Berebak enggau tu Fatimah madah, nitihka 26th Report Of The Malaysian and Transplant Registry 2018, penyampau perubat rusak tungkul sengayuh ba renggat ke penudi di Sarawak ba taun 2017 iya nya 174 iku per satu juta peranak dibandingka enggau 193 iku per satu juta peranak.
Tikas penuduk Sarawak ba taun 2018 iya nya kedua pemadu baruh pengudah Sabah / Labuan (115 per satu juta peranak) dibandingka enggau penyampau perubat renggat menua iya nya 260 per satu juta peranak.
"Rikod Opis Pengerai Nengeri Sarawak (JKNS) ba taun 2020, mandangka bisi 3,665 iku pesakit tungkul sengayuh di Sarawak.
"Ari penyampau nya, 3,192 iku berubat chara hemodialisis, 352 benung berubat CAPD enggau 121 iku udah bebuntas tungkul sengayuh lalu diatu dalam timpuh diperatika," ku iya.
Berebak enggau tu Fatimah minta sereta meransang gerempung ukai dikuasa perintah (NGO) baka National Kidney Foundation (NKF) - Sarawak Kidney Association/Rotary (Kuching) enggau Persatuan Diabetes Malaysia (PDM) Cawangan Sarawak ngambika terus bejalaika tanggung pengawa meri penyedar ngagai orang mayuh pasal CKD enggau ngajar pesakit enggau penyaga pasal baka ni ngubat penyakit nya.