Pinta ba penetap minta gawa nyadi polis diberi pengelunggar ungkup ukai Bumiputera

KUCHING: Pinta ba penetap mesti pas kredit ba matapelajar Bahasa Malaysia (BM) dalam Sijil Pelajaran Malaysia (SPM) ngambika ulih minta masuk nyadi raban Polis Diraja Malaysia (PDRM) dilunggar ungkup pengawa ngambi khas ukai Bumiputera.

Direktor Pengatur PDRM Datuk Ramli Din madah, penetap nya dilunggarka kena ngambil orang ngagai pangkat Konstabel Polis Gred YA1 (lelaki/indu) enggau Konstabel Orang Asli Gred YP1.

Ku iya, peminta ngelunggarka penetap nya udah dipinta ari Jabatan Perkhidmatan Awam (JPA) ungkup sesi ngambi orang baru berengkah ari 18 nyentuk 31 Mac tu.

"Sebedau tu netapka mesti bisi dua kredit dalam SPM iya nya BM enggau siti malapelajar bukai, tang sekali tu semina siti kredit ditetapka, iya nya barang bagi matapelajar.

"Taja pia, nyema mujur dipilih, orang nya mesti ngambi baru peresa ba matapelajar BM renggat SPM lalu mesti bulih kredit, tang nyema mengkang enda pas, servis sida deka diketuka," ku iya madah maya aum media khas ba Indu Opis Polis Bukit Aman, kemari.

Kelimpah ari penetap nya, PDRM mega minta ngagai JPA meri pengelunggar ngagai penetap fizikal ngambika tau ngambi orang asli.

"Dalam konstitusyen mega bisi pengelebih orang asli tu lalu kami mega meri pengelunggar mimit sentang peninggi ti dditetapka ti diturunka mimit ari 1.57 sentimeter (cm) ngagai 1.55 cm ungkup orang indu," ku iya.

Tambah iya, penetap bukai baka tikas umur nadai diubah sereta nadai 'kouta' ditetapka ungkup pengawa ngambi khas tu.

Ku iya baru, ti dikemeratka miya nya landik bejaku China, Tamil enggau jaku bansa bukai.

"Nya alai, peminta nya tau digaga nengah website epengambilanpdrm.rmp. gov.my lalu berebak enggau nya mega, PDRM deka ngatur interbiu ba sekeda mengeri besai di serata menua.

"Chalun ke mujur deka nemu pemutus nya nengah surat lalu kami melabaka pengawa ngambi orang baru nya deka berengkah kena ujung bulan Jun tauka pun bulan Julai," ku iya.

Bejaku sentang gaji, Ramli madahka ungkup pengku pengawa nya tersebut PDRM meri batang gaji berengkah ari RM1,441 lalu sekeda elawin tambah nyentuk RM995.

"Nya enda nyegkaum nyema sida ditukar ngagai opis ke ngembuan elawin bukai, ambika chunto Pasukan Gerakan Am (PGA) deka bulih RM400, detektif (RM300) enggau trafik elawin tambah sepenyampau RM200," ku iya.