Mordi enda betukar parti, agi tetap enggau DAP
KUCHING: Kaban parlimen Mas Gading Mordi Bimol bebendar madah diri enda betukar parti sereta agi meruan enggau Parti Tindakan Demokratik (DAP) Sarawak.
Ku iya nerang, apin lama mayuh tekenyit ninga berita selebubu madah iya deka betukar kena meri sukung ngagai perintah Perikatan Nasional (PN).
“Enggau bebendar aku madah ditu, nya bula. Aku agi tegap nyadi pengari rayat DAP sereta Pakatan Harapan (PH) lalu deka terus bejaku enggau gawa ke rayat ti diarika aku lebih agi ba Mas Gading.
“Penanggul pengerai mimit ngeruga tikas pemanah kereja aku tang ukai prinsip aku. Aku dalam politik ukai ketegal pengerindu tang tanggungpengawa sereta ti nganjung aku ke parlimen iya nya rayat Mas Gading,” ku iya ba sebengkah penerang ditu, kemari.
Mordi madah, lompat parti entara norma baru ti dibantah tang tetap chakah dalam politik ba menua tu.
Ku iya, tu ukai semina ngayanka politik Malaysia enda tegap tang mega nunjukka prinsip pengari rayat kemaya hari tu enda tetap.
Tang berebak enggau tu iya arap bendar sikusiku bisi tegal ke diri empu enti deka betukar tauka tetap dalam parti ti diarika maya PRU ke udah diatur.
“Kebuah besai aku meda ulah betukar parti tu iya nya isu ungkup belanja khas ba sitak parlimen.
“Ari suba nyentuk diatu, semina pengari rayat blok perintah aja deka nerima ungkup belanja nya, tang nadai diterima blok penyakal.
“Nya alai nya siti ari kebuah ti dikena ‘nginti’ pengari rayat ari blok penyakal,” ku iya.
Bebendar iya madah nya pekara ti chukup serius sereta patut diperatika laban ku iya bisi penumbuh perintah pintu belakang sehari tu iya nya empas ari ulah sekeda orang ti semina ngerunding diri enggau amu ke pangkat nyetuk enda ingatka nasib rayat.
Ambika chunto ba Mas Gading, ku iya nerang, rayat sitak parlimen nya ti kena empas ari ulah betukar parti.
“Orang bukai ti ngaga ulah, kandang endur bukai ti nanggung. Enggau sekijap mata, Mas Gading nyadi sitak ari baruh kaban parlimen penyakal lalu tekala nya ungkup belanja ba sitak parlimen ditarit pulai. Nama kebuah enda narit pulai elawin pengari rayat ti betukar nya,” tanya iya.
Nya alai, ku Mordi, taja pan betapi enggau politik Malaysia ti balat begelumbang, kapal DAP tetap tegap nengah jalai ti amat.
“Peneleba tu mai aku majak arap ngagai kapal ti ditiki ngelama tu. Taja pan nadai pengaya, tang dibai enggau pengelurus.
“Begulai enggau 41 iku kaban parlimen DAP ke bukai, kami deka terus kering bepegai ba prinsip pekara ti didegika parti enggau ngetanka mandat ti diberi rayat,” ku iya.