Program Imunisasi COVID-19 ATM di Sarawak dimunka kemari
KUCHING: Program Imunisasi COVID-19 Raban Soldadu Malaysia (ATM) ba Sarawak dipenyadi kemari ba Dewan Bukavu, Kem Penrissen ditu.
Pengawa bejadi nya digulu Panglima 1 Divisyen Mejar Jeneral Datuk Dzulkafli Mustafa ngarika Panglima Medan Timur Tentera Darat, Leftenan Jeneral Datuk Mardzuki Muhammad.
Bejaku ba aum pengarang berita ti diatur ba Kem nya, Dzulkafli madah bisi 7,020 dos vaksin Pfizer-BioNTech COVID-19 ba renggat keterubah program tu udah datai ba Kuching ensanus (11 Mac).
“Ba renggat keterubah, deka lebih dikemeratka iya nta diberi ngagai raban tauka anggota perubat soldadu enggau sida anggota ti gawa ba zon mirah enggau sepemanjai garis entara menua.
“Vaksin mega udah dianjung ke Sibu, Bintulu enggau Miri iya nya program imunisasi ti sama mega diatur sehari tu (kemari),” ku iya.
Bekaul enggau proram nya kemari, bisi 120 anggota soldadu darat enggau langit ti gawa ngelinggi Kuching udah nerima tuchuk keterubah dos vaksin Pfizer-BioNTech COVID-19.
Sama nerima tuchuk keterubah dos vaksin kemari Dzulkafli enggau Panglima 3 Briged Brigedier
Jeneral Datuk Azhar Ahmad.
Program tu ku Dzulkafli, tuju iya kena nempa kelompok imuniti dikena nagang pandemik ba menua.
Kelimpah ari nyaAzhar ba aum pengarang berita ke sama beterima kasih ngagai perintah enggau pemesai ATM bekaul enggau vaksin nya.
“pengudah program imunisasi tu kami deka terus nyaga enggau mantu perintah mutuska rentayan rampit virus COVID-19 dalam menua,” ku iya.
Pun bulan tu, diripotka bisi 3,500 anggota ATM ba Sarawak deka nerima vaksin Pfizer-BioNTech COVID-19.
Ari baruh renggat keterubah, dipelaba 35 peratus ari anggota ATM ba Sarawak deka dituchuk vaksin.
Anggota ke benung gawa ba pos garis entara menua deka nerima vaksin pemulai sida ngagai pangkalan diri empu ba baruh renggat kedua program tu.