MAFI udah ngagihka RM5,590,000 ungkup IADA Kalaka-Saribas-Betong
KUCHING: Opis Menteri Betanam Betupi enggau Industri Pemakai (MAFI) udah meri ungkup belanja pemansang taun 2021 sepenyampau RM5,590,000 ngagai ejensi ti dipegai iya nya Kawasan Pembangunan Pertanian Bersepadu (IADA) Kalaka-Saribas-Betong.
Sait Menteri Kuasa enggau Pengeraja Asal Datuk Ali Biju madahka opis menteri nya (MAFI) ngungkupka belanja nya ti enggau tuju kena ngemansangka kandang endur betanam betupi ba Bagi Menua Betong nyengkaum kandang menua Saratok.
Ku iya, orang betanam betupi ba IADA Kalaka-Saribas-Betong ngembuan tanah ti besai alai ngemansangka projek betanam betupi ke bisi potensial, peminta tinggi enggau dagang besai alai nyual produk tauka asil pemansut Agromakanan.
“Kandang menua tu endang bisi potensialai ngemansangka projek betanam betupi laban tanah ti setipak enggau gaya mua hari ti ulih mantu nambahka pemansut asil Agropemakai seraya ulih mantu nyungkakka penatai pemisi peranak menua tu.
“Ba taun 2021, IADA Kalaka Saribas Betong udah ngemendarka 129 iku penyereta projek ti ngambi bagi dalam projek pemansang nanam nanas; nanam buah; integrasyen betanam betupi; nanam sayur enggau ‘kontan’; teknologi fertigasyen; industri betupi; industri akuakultur enggau projek pemansang ti meruan Agropemakai, ba kandang endur 97 hektar pemesai.
“Ungkup belanja pemansang ari perintah besai tu ulih mantu orang betanam betupi mutarka penanggul ungkus ngepunka projek ti begunaka belanja besai,” ku iya ti mega Kaban Parlimen Saratok ba sebengkah penerang berita, kemari.
Nambahka nya ku iya, ulih mantu nambahka produktiviti enggau asil ti bekualiti awakka ulih besemekih ba pasar menua tu sereta ulih dieksport ke luar menua.
Projek pemansang nya mega dikearapka ulih dipejalaika dalam timpuh panjai sereta ngeluarka asil enggau meri penguntung ngagai orang betanam betupi nya empu, ku iya.
“Projek pemansang betanam betupi 2021 ti deka meri penguntung ngagai 129 penyereta IADA KalakaSaribas-Betong nyengkaum bekaul enggau penyikap kereban infrastruktur enggau input betanam batupi,” ku iya ti mega Kaban Kunsil Nengeri Krian.
Dikena ngemujurka projek tu, Program Pengerejista Penyereta & Nyuaka Surat Pemendar Projek Pemansang enggau Betanam Betupi Taun 2021 udah diatur dua hari (11-12 Mac 2021) ti betuaika Direktor IADA Kalaka-Saribas-Betong Tedong Bugak.