Ngemansangka menua tanggungpenga semua raban bansa
PSB komited ngadaka komuniti ti ulih bekerejasama enggau manah, mantu rayat ti tekeruga laban COVID-19
“
Taja pia, nyema bisi pengirau lalu asai kediri, tu enda manah ngagai pemansang menua. Tu ulih ngujungka ngagai raban bansa ti pambar sereta
” mayuh agi.
SIBU: Presiden Parti Sarawak Bersatu (PSB) Dato Sri Wong Soon Koh madah, pengawa ngemansangka menua tu iya nya tanggungpengawa semua raban bansa.
“Pengawa ngemansangka menua tu iya nya bepanggai ba semua raban bansa, enggau semua komuniti bekerejasama enggau manah.
“Taja pia, nyema bisi pengirau lalu asai kediri, tu enda manah ngagai pemansang menua. Tu ulih ngujungka ngagai raban bansa ti pambar sereta mayuh agi,” ku iya.
Wong ke mega Kaban Kunsil Nengeri (ADUN) Bawang Assan madah munyi nya lebuh ngemunka Tim Pengereja Pengawa PSB Kandang Menua Tengah ba Opis PSB Bawang Assan, kemari.
Nitih ku Wong, Tim Pengereja Pengawa PSB deka ngiga kebuah lapa raban bansa China ngelama tu nyukung penyakal lalu ukai nya perintah.
Presiden PSB
“Mutarka asai ti enda puas ati rayat kelebih agi dalam raban bansa China ngagai perintah iya nya isu ti deka kitai peda,” ku iya.
Ungkup pekara nya, ku iya, siti program randau deka diatur kena meri peluang ngagai rayat mantaika asai ati sida sereta pengurang ti bisi.
“Ari nya, kitai deka ngiga chara mutar ke lalu ulih mantu ngadaka komuniti ti lantang sereta beserakup,” ku iya nerang.
Ungkup Sibu ku Wong, pansik udah digaga ngagai sekeda penanggul tauka isu udah dipejalai baka penusah jalai ti sekut enggau pelin ngaga tebat ambuh bah.
PSB ku iya, udah nyiri penyanding penemu kena ngaga pansik lalu udah madahka langkar kena mutarka penanggul sereta penyampau ungkus ungkup projek nya.
Kelimpah ari nya, PSB ku Wong enda semina ngemeratka bekaul pekara pemansang, tang mega pengidup rayat ti tekeruga laban pandemik COVID-19.
“Tim kitai udah ngelangkar pelin ti mungkur semua lalu ngiga jalai bakani deka bejalaika nya kena ngemansangka semua ekonomi, bakani deka nyelamatka nyawa, kereja enggau dagang.
“Tang nama ti pemadu berat bakani deka nentuka tetiap ruang bilik ti tekeruga laban COVID-19 bisi utai ke dipakai,” ku Wong nyemetak.
Tim Pengereja Pengawa Kandang Menua Tengah iya nya ari Chairman PSB Pelawan Kapitan Datuk Janet Lau, Pemangku Chairman PSB Dudong Kong Tze Ling, Pemangku Chairman PSB Bukit Assek Andrew Ting Kee Nguan, chalun ti bisi potensial Pelawan Dr Low Chong Nguan sereta chalun ti bisi potensial Bukit Assek Dr Ling Sien Ngan.
Kaban ke bukai iya nya Lau Chung Lii, Chin Su Meng, Wong Hii Ping enggau Penghulu Chan Bak Yau.
Dato Sri Wong Soon Koh