JKNS ngenukuka bisi tiga kluster komuniti baru di Sarawak kemari

KUCHING: Sarawak bisi tiga agi kluster baru COVID-19 iya nya ba Pelilih Menua Sri Aman, Meradong enggau Miri.

Sapit Kepala Menteri ti mega Chairman Komiti Mutarka Penusah Ngenyit Nengeri Sarawak (JPBNS), Datuk Amar Douglas Uggah madahka, tiga kluster baru iya nya kluster komuniti.

“Sehari tu, Opis Pengerai Nengeri Sarawak (JKNS) udah netapka tiga kluster baru iya nya Kluster Jalan Main Bazaar ba Pelilih Menua Sri Aman, Kluster Buluh Pasi ba Pelilih Menua Meradong enggau Kluster Sena ba Pelilih Menua Miri,” ku iya madahka nya ba aum pengarang berita COVID-19 Sarawak, kemari.

Bekaul enggau Kluster Jalan Main Bazaar, Sri Aman, ku iya, kes indeks kluster tu iya nya kes ke-9,908 siku indu peranak menua (Sarawak) beumur 52 taun ti ditemu nengah pengawa beperesa pra-beputung ba Sepital Besai Sarawak kena 1 Mac 2021.

Nitih ku iya, semua kontak semak kes ti bekaul enggau kluster tu udah ditemu sereta dipasukka ba palan kurantin ngambika diperesa sereta diserara ari orang bukai.

Kes ke udah ditemu positif COVID-19 udah dipasukka ba Sepital Besai sarawak enggau PKRC Sri Aman ngambhika diserara sereta diperubatka.

“Kluster Jalan Main Bazaar tu siti kluster komuniti ti udah nyadi ba sebuah genturung pendiau ba Jalan Main Bazaar, ba Pelilih Menua Sri Aman ti bekaul enggau sebuah ruang bilik sereta udah nya lalu ngerampit nembiak sekula ba sebuah sekula secondari ba Sri Aman.

“Asil ari meresa ngena rT-PCR, nambah 11 kes ditemu positif COVID-19 ti nyengkaum 10 iku diri sebilik kes indeks (Kes Ke-10672, 11075, 011076, 11077, 11078, 11080, 11081 enggau 11082) sereta dua agi bakih sekula siku ari kontak (kes ke-11696 enggau 12039) ti ditemu positif COVID-19.

“Bisi 133 individu udah diperesa lalu ari penyampau nya 12 individu ditemu positif COVID-19 nyengkaum kes indeks, 103 individu ditemu negatif enggau 18 individu agi nganti pemutus,” ku iya seraya madah pengawa nyidi kontak agi chakah dipejalaika.

Kluster Buluh Pasi, Meradong, ku Uggah, kes indeks kluster tu iya nya kes ke7,689 ti ditemu nengah pengawa meresa ba endur kereja ti dipejalaika pengaji iya.

Bisi 267 individu bekaul enggau kluster tu udah diperesa lalu ari penyampau tu bisi 21 kes udah ditemu positif COVID-19 nyengkaum kes indkes, 246 kes ditemu negatif enggau nadai kes nganti pemutus makmal.

Lalu semua 21 kes ke ditemu positif nya udah dipasukka ba Sepital Sarikei ngambika diserara sereta diperubatka.

“Kluster Buluh Pasi iya nya kluster komuniti ti ditemu bekaul enggau sebuah rumah panjai ba kandang menua Sungai Buluh, Jalan Pasi ba Pelilih Menua Meradong dalam Bagi Menua Sarikei Sarawak.

“Indeks kes ti gawa ba Mengeri Sibu udah beperesa ba Klinik Pengerai Lanang, Sibu sereta ditemu positif COVId-19 kena 20 Februari 2021. Indeks kes mega dipelaba dirampit ba Pelilih Menua Sibu aiya nya rampit komuniti.

“COVID-19 berampit ba entara kes-kes dalam kluster tu iya nya nengah pengawa begulai enggau pangan diri ba dalam rumah panjai ti sama,” ku iya.

Nambahka nya ngenag bekaul enggau Kluster Sena, Miri, iya madahka, kes indeks kluster tu iya nya kes ke8,866 siku indu peranak menua (Sarawak) beumur 47 taun ti ditemu ari pengawa meresa individu bisi tanda kena 24 Februari 2021 pengudah bisi ngayanka tanda kenyau ari 19 Februari 2021.

Ku iya, bisi 166 individu udah diperesa lalu ari penyampau nya bisi 61 individu ditemu positif COVID-19 nyengkaum kes indkes, 95 individu ditemu negatif enggau 10 individu agi nganti pemutus makmal.

“Kluster Sena iya nya kluster komuniti ti ditemu ba Pelilih Menua Miri ti bekaul enggau kontak semak ngagai kes indeks ba Lorong Sena di Desa Senadin, Permyjaya enggau dua buah rumah panjai ba Pelilih Menua Subis,” ku iya.

Kelimpah ari nya Uggah mega madah Kluster Bintang Daily, Meradong ditetapka nadai agi nyadi laban nadai kes baru ditemu.

Kluster Bintang Daily ditetapka kena 1 Februari 2021 enggau kes kepenudi bekaul enggau kluster tu ditemu kena 11 Februari 2021.

Bisi 70 iku udah diperesa sereta ari penyampau nya bisi 10 individu ditemu positif COVID-19 nyengkaum kes indeks enggau 60 individu ditemu negatif.

“Sehari tu, Opis Pengerai Nengeri Sarawak udah netapka Kluster Bintang Daily ba Pelilih Menua Meradong, Bagi Menua Sarikei nadai agi nyadi pengudah nadai kes baru ditemu bekaul enggau kluster tu,” ku iya.