Polis ngemeratka isu nipu dokumen bekaul pemutus peresa COVID-19
KUCHING: Polis endang ngemeratka isu nipu dokumen pemutus peresa COVID-19 laban nya ulih ngeruga pengerai mensia mayuh.
Ketuai Unit Nasat Penyalah Komersial (JSJK) Sarawak Superitendan Maria Rasida lebuh bejaku ba aum pengarang berita COVID-19 Sarawak kemari, minta rayat nengeri tu patut ngembuan tanggungpengawa dalam pekara tu.
“Lalau ari polis iya nya polis chukup ngemeratka isu nipu dokumen pemutus ujian beperesa COVID-19 laban tu ngeruga pengerai orang mayuh.
“Orang ti ngereja penyalah tu ulih ditinggang ukum nya alai kami (polis) ngelalau anang nipu dalam pekara tu.
“Premis pengerai tauka makmal ti nyendiaka servis meresa COVID-19 mega diingatka ngambika enda ngaga ripot pengerai bula tang patut bejalaika tanggungpengawa enggau manah,” ku iya ba aum pengarang berita ti diatur ba Bengunan DUN Lama ditu.
Dulu ari nya iya ngenang polis bisi nerima dua ripot bekaul enggau ngaga dokumen pemutus ujian beperesa COVID-19 sereta pekara nya diripotka Sekretariat Komiti Mutarka Penusah Ngenyit Nengeri Sarawak (JPBNS) enggau Opis Kepala Menteri kena 6 Mac 2021 enggau 8 Mac 2021.
Nitihku iya, polis mansik pekara nya ari baruh Seksyen 420 Kanun Keseksaan ti ulih diukum jil enda kurang ari setaun enggau enda lebih ari 10 taun sereta sipat enggau ukum.
“Pengudah nerima ripot polis nya, bisi 11 iku lelaki ba kandang menua pelilih menua Kuching ditangkap kena 7 Mac 2021 enggau 12 Mac 2021. Sama dirampas siti telefon binching enggau beberapa iti kad sim.
“Bisi lapan orang ke disangka udah dilepas ngena jamin polis sereta tiga iku orang ti disangka ti ditangkap tadi (kemari) agi dalam perati polis.
“Dua kes nipu tu bekaul enggau klinik peribit enggai bisi minta bayar entara RM50 ngagai RM100,” ku iya seraya madah diri enggai ngenang silik pekara nya nya laban kes benung dipansik.
Keretas pansik deka dibai ngagai Pejabat Timbalan Pendakwa Raya Malaysia Negeri Sarawak enda lama agi pengudah pansik tembu dipejalaika, ku iya.
Bisi ba aum pengarang berita nya Sapit Kepala Menteri ti mega Chairman JPBNS Datuk Amar Douglas Uggah Embas, Menteri Kaunsil Kandang Menua enggau Pengawa Berumah Dati Sri Dr Sim Kui Hian enggau Direktor Opis Pengerai Nengeri Sarawak Dr Chin Zin Hing.