Uggah: Rayat di kandang menua ulu diperambu betuchuk vaksin sereta

KUCHING: Rayat ba kandang menua ulu nengeri tu dipelaba deka dituchuk vaksin COVID-19 sereta kena ngelimat ungkus belanja logistik.

Sapit Kepala Menteri Datuk Amar Douglas Uggah Embas madahka pekara tauka perambu nya udah dikenataika ngagai Kuala Lumpur.

Laban ku iya mai program imunisasi ngagai menua ulu pemar besai ti ditapi Komiti Mutarka Penusah Ngenyit Nengeri Sarawak (JPBSN).

“Kena nentuka pengulih kitai meri tuchuk vaksin ngagai semua rayat, nya kebuah kitai meri perambu ngagai Kuala Lumpur maya kitai ngelawa menua ulu pengawa nuchuk vaksin tu dipejalaika sereta enda ngira sekalika penerima nya ba renggat kedua tauka ketiga, tu mega ngambika kitai enda pulai mansang.

“Kitai ngarapka Kuala Lumpur deka nerima perambu kitai tu kena ngelimat ungkus belanja,” ku iya ti mega chairman JPBNS ba aum pengarang berita COVID-19 Sarawak ditu, kemari.

Iya madahka komiti patut merambu enggau silik dikena nentuka vaksin datai magang ba serata Sarawak.

Juluk tauka tagit nengeri tu deka nembuka program imunisasi tu ba bulan Ogos tang iya bepanggai ba stok tauka bekal vaksin ke diterima.

“Enti diberi peluang, kitai enda bebagi ati deka meli vaksin kediri empu laban Kepala Menteri udah nyendiaka ungkup belanja ke tuju nya nyema patut,” ku iya.

Kelimpah ari nya lebuh ti ngenang gaya COVID-19 ba nengeri tu, iya madahka kes agi tinggi sereta komiti patut nukar chara mutarka iya.

Ambika chunto ba Miri, keterubah sida dikuarantin ba rumah panjai tang enda efektif lalu nya ali udah nya dikuarantin ba palan kuarantin, sereta chara ti sama dipejalaika ba endur ke bukai.