COVID-19: Sarawak ngerikod 183 kes baru positif, tiga kes pemati
KUCHING: Sarawak kemari ngerikodka 183 kes positif baru enggau tiga iti agi kes pemati ketegal rampit COVID-19.
Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madahka nya nyadika penyampau semua kes positif COVID19 nambah nyadi 12,885 kes enggau 94 kes pemati ba nengeri tu.
“Sehari tu bisi 183 kes baru COVID-19 ditemu ba Sarawak. Pelilih menua ti ngeripotka kes iya nya Pelilih Menua Sibu (73), Miri (22), Bintulu (17), Kapit (17), Julau (12), Kuching (12), Meradong (7), Betong (6), Samarahan (4), Sarikei (3), Selangau (3), Saratok (2), Sri Aman (2), Belaga (1), Dalat (1) enggau Tanjung Manis (1). Ti ngujungka penyampau semua nambah nyadi 12,885 kes.
“Ari 183 kes baru ti diripotka, bisi 23 iku udah ngayanka tanda enggau betapi enggau tanda rampit COVID-19 maya pengawa meresa dipejalaika.
“Lalu ari semua kes baru nya, bisi 96 kes asil meresa individu ti bisi kontak kes positif COVID-19 (5 iku bisi tanda); 57 kes asil meresa individu dalam kluster aktif ke udah bisi (5 iku bisi tanda); 20 kes bukai beperesa ba fasiliti pengerai (4 iku bisi tanda); sembilan (9) asil ari meresa individu bisi tanda ba fasiliti pengerai enggau siti (1) kes bekaul enggau individu ti pulai ari nengeri bukai dalam Malaysia ti dikategori nyadi kes Import B.,” ku JPBNS, kemari.
Bekaul enggau kes pemati COVID-19 baru, JPBNS ngeripotka kemari bisi tiga (3) kes pemati ketegal rampit COVID-19 lalu ngujungka penyampau semua kes pemati ketegal penyakit tu ba Sarawak bisi 94 iku.
Tiga kes pemati baru ti bekaul enggau tiga iku lelaki peranak menua (Sarawak) udah dipasukka ba Sepital Sibu sereta ditetapka udah nadai kena 15 Mac 2021.
“Kes pemati ke-92 iya nya kes ke-7,674 siku lelaki peranak menua (Sarawak) beumur 72 taun di udah dipasukka ba Sepital Sibu laban bisi tanda tabin, batuk enggau bisi penanggul enseput. Ujian Rapid Molecular ditemu positif kena 19 Februari 2020 sereta kes bisi ko-morbid penyakit darah tinggi enggau penyakit tungkul ati.
“Kes pemati ke-93 iya nya kes ke-11,319 bekaul siku lelaki peranak menua (Sarawak) beumur 84 taun ti terus dipasukka ba Sepital Sibu pengudah beperesa rT-PCR COVID-19 ditemu positif kena 8 Mac 2021. Kes bisi ko-morbid penyakit tungkul ati, darah tinggi, enggau penyakit lempuang obstruktif kronik (COPD).
“Lalu kes pemati ke-94 iya nya kes Ke-9,492 siku lelaki peranak menua (Sarawak) beumur 69 taun udah diperubat ba Sepital Sibu laban bisi tanda tabin, batuk enggau enda masuk makai.
Peresa rT-PCR ke dipejalaika ditemu positif kena 27 Februari sereta kes mega bisi ko-morbid penyakit darah tinggi enggau kemi manis,” ku JPBNS.
Komiti meri penyinu ati ngagai sida ke sebilik enggau kes pemati nya.
Kelimpah ari nya JPBNS kemari mega bisi ngeripotka 204 kes baru udah gerai sereta dikemendarka pansut ari Sepital Sibu (121), Sepital Bintulu (26), PKRC Sepital Kapit (18), PKRC Betong (14), Sepital Miri (10), Sepital Besai Sarawak (8), Sepital Sarikei (6) enggau PKRC Mukah.
Tu ngujungka penyampau semua kes positif COVID-19 ke udah gerai sereta dikemendarka pansut ari sepital naka kemari bisi 10,401 iku tauka 80.72% ari penyampau semua kes COVID-19 di Sarawak, ku JPBNS.
Kemari mega bisi 185 PUI baru udah diripotka enggau dua PUI ti agi nganti pemutus peresa makmal.