Sarawak deka meli vaksin COVID-19 kediri empu: Uggah
Kena nentuka rayat nengeri tu nerima vaksin nitih ti udah ditimpuhka
“
Aku udah nganjung surat sehari tu ngagai YB Khairy Jamaluddin ti madahka Sarawak endang bisi ati deka meli vaksin, nyema vaksin ti dibekal perintah besai enda ulih nitihka maya meri vaksin ba
”
Sarawak.
Datuk Amar Douglas Uggah Embas
Sapit Kepala Menteri
KUCHING: Surat peminta ari perintah nengeri tu ke deka meli vaksin COVID-19 udah dianjung ngagai perintah besai nengah Menteri Koordinator Program Imunisasyen COVID-19 Menua, Khairy Jamaluddin.
Sapit Kepala Menteri, Datuk Amar Douglas Uggah Embas madah surat peminta nya dianjung iya kemari ngagai YB Khairy ti mega Menteri Sains, Teknologi enggau Inovasyen ke lalu nyadi Chairman Begulai Komiti Khas, Jaminan Akses Bekalan Vaksin COVID-19.
"Aku udah nganjung surat sehari tu ngagai YB Khairy Jamaluddin ti madahka Sarawak endang bisi ati deka meli vaksin, nyema vaksin ti
dibekal perintah besai enda ulih nitihka maya meri vaksin ba Sarawak.
"Kitai meda ba surat berita, YB Khairy madah perintah nengeri ulih meli (vaksin COVID-19 kediri empu) enggau pesan ke diterima ari iya (YB Khairy) madah diri bedau nerima surat ari kitai
Sarawak. Kitai udah nganjung surat nya sehari tu ngagai iya," ku iya nyaut lebuh ditanya pekara nya.
Uggah ti mega Chairman Komiti Mutarka Penusah Ngenyit Nengeri Sarawak, nerangka pekara nya nyerumba aum pengarang berita COVID-19 Sarawak ti diatur ba Begunan DUN Lama ditu, kemari.
Uggah madah, kebuah Sarawak deka meli vaksin COVID-19 ke diri empu kena nentuka rayat nengeri tu nerima vaksin nitih ti udah ditimpuhka.
"Di Sarawak kitai udah nimpuhka iya nya ba ujung bulan Ogos tu kitai ngarapka ulih meri tuchuk vaksin ngagai peranak Sarawak.
"Taja pia kitai mega deka bepanggai ba kapasiti sereta bepanggai ba stok vaksin nya," ku iya.
Sama bisi ba aum pengarang berita nya, Menteri Kaunsil Kandang Menua enggau Pengawa Berumah Dato Sri Dr Sim Kui Hian enggau Direktor Opis Pengerai Nengeri Sarawak Dr Chin Zin Hing.