Perintah GPS nadai kala nagang raban Kristian di Sarawak ngena leka jaku ‘Allah’
KUCHING: Perintah Gabungan Parti Sarawak (GPS) nadai kala nagang raban Kristian di Sarawak ngena leka jaku ‘Allah’ enggau basa ti besai.
Opis Kepala Menteri nengah penerang berita kemari, nyemetak madahka perintah GPS berengkah ari Tun Pehin Taib Mahmud lalu ditangkanka Pehin Sri Adenan Satem enggau kepala menteri ke diatu, perintah nengeri endang konsisten dalam polisi bebatak asur ba jalai pengarap.
Perintah GPS ku iya, deka majak ngenan sereta ngintu toleransi ba jalai pengarap di Sarawak laban nya batang pekara dikena ngempung pupu bansa di nengeri tu.
Ku iya, nya dikeamatka nengah pengawa numbuhka Unit Pekara Jalai Pengarap Bukai (UNIFOR).
“Kami nem bisi sekeda orang semina ‘berlagak juara’ nunda jaku Tok Nan (exKepala Menteri Pehin Sri Adenan Satem), mepolitikka isu tu laban pengawa bepilihan nengeri (PRN) majak semak deka diatur.
“Ketuai GPS andal sereta pecayaka rayat enda mudah tekuing runding enggau chara ti tau ngasuh saru runding sereta ngeruga penegap penemu perintah, tang perintah majak deka nyaga penyerakup ba jalai pengarap di Sarawak.
“Orang Islam bebasaka raban Kristian lalu pia mega orang ti megai jalai pengarap bukai. Nadai kala bisi jaku tagang ngagai raban Kristian di Sarawak ngena leka jaku ‘Allah’ enggau penuh bas,” ku iya nyemetak.
Kena10 Mac tu tadi, Kort Tinggi ngemendarka orang ti megai jalai pengarap Kristian di serata menua ngena leka jaku Allah dalam publikasyen pelajar jalai pengarap nya.
Kelimpah leka jaku Allah, tiga iti agi leka jaku bukai ti dikemendarka iya nya Baitullah,
Kaabah enggau solat tang mesti disempulang enggau jaku tangkan, ‘ semina ungkup raban Kristian’ lalu lambang regang ba kulit mua bup.
Taja pia, kena 15 Mac tu tadi Opis Menteri Dalam Nengeri (KDN) enggau Perintah Malaysia ngapilka pemutus Kort ti udah ngaga pemutus ke alai raban jalai pengarap Kristian tau ngena leka jaku ‘Allah’ enggau tiga iti agi leka jaku Arab dalam publikasyen jalai pengarap ke tuju kena belajar.
Ulah KDN enggau Perintah Malaysia nya udah ngujungka bisi bemacham jaku ti bal ari mensia mayuh.