Raban B40 nyambut manah bantu program PEMERKASA
KUCHING: Rayat kelebih agi B40 nyambut manah bantu ari baruh Program Strategik Negapka Rayat enggau Ekonomi (PEMERKASA) kena mantu orang ti lenyau penatai pemisi.
Ari batuh inisiatif tu,raban B40 ti lenyau jalai penatai pemisi deka nerima mata duit Rm500 ke sekali diberi.
Penerima Bantu Prihatin Rakyat (BPR) ke ngembuan penatai pemisi RM1,000 ke baruh deka nerima bayar tambah sepenyampau RM500 berengkah ari bulan Jun tu.
John Pata, 49, madahka bantu tu patut sereta ngena amat kelebih agi ngagai raban B40 ti napi pemar sereta lenyau penatai pemisi ketegal pandemik COVID-19.
“Terima kasih ngagai perintah besai ke ari baruh iring Menteri Besai,Tan Sri Muhyiddin Yassin ti udah siruka penusah rayat kelebih agi raban B40.
“Nyadi rayat, kami ngarapk bantu tu ulih mantu ngelempungka tating pengidup rayat kelebih agi ba maya ke mar diatu,” ku iya madah ngagai Utusan Borneo.
Berebak enggau nya Mary Antionette, 32, madahka bantu tu endang patut tang ungkup timpuh ke pandak.
“Bantu mata duit ke diberi nya semina ulih ngelantangka rayat ungkup siti timpuh aja laban nya semina diberi sekali aja.
“Taja pia kami nyambut manah bantu tu kelebih agi ba raban B40 laban ulih mantu sida ba maya ke mar diatu,” ku Mary.
Ba Riandeka Nissen, 28, bantu tu mega ulih ngelempungka tating pengidup rayat taja pan dibayar sekali aja kelebih agi ti nadai penaai pemisi ketegal pandemik tu.
Iya mega madah, rayat mesti bisi inisiatif kediri empu kena ngulihka penatai pemisi bukai ngambika enda semina bepanggai ba bantu ari perintah.
“Bantu mata duit tu semina ungkup sementara aja, tambah mega RM500 ukai nya mayuh, nya alai kena mih enggau manah ba utai ke beguna aja,” ku iya.
Kededua kategori penerima bantu tu berumur entara 21 nyentuk 60 taun lalu sida tau enda ibuh ngerejista diri minta.
Bantu nya deka dibayar ngagai akaun penerima pengudah ditukuka nadai agi jalai penatai pemisi ke alai nya diperesa nengah sistem Opis Asil Dalam Nengeri (LHDN), Kumpulan Wang Simpanan Pekerja (KWSP) enggau Gerempung Pengelikun Sosial (PERKESO).