Bisi dua iti kluster baru COVID-19 di Serian
KUCHING: Opis Pengerai Nengeri Sarawak (JKNS) netapka dua iti agi kluster baru COVID-19 iya nya ba Pelilih Menua Serian enggau Pelilih Menua Meradong.
Sapit Kepala Menteri, Datuk Amar Douglas Uggah Embas madahka dua kluster baru iya nya Kluster Depot Imigresyen Semuja, Serian enggau Kluster Sungai Atap, Meradong
"Kluster Depot Imigresyen Semuja, Serian iya nya kluster bekaul enggau depot alai imigresyen ngetanka orang tama enda berasat ba Depot Imigresyen Semuja ba Pelilih Menua Serian.
"Kluster tu ditemu Opis Pengerai Bagi Menua Serian ke udah bejalaika pengawa meresa semua raban Opis Imigresyen Malaysia (JIM) enggau orang ke ditan ba depot nya pengudah bisi individu ti ditemu positif ujian rT-PCR ba orang luar menua datai enda beradat (PATI) ti diburu pulai nengah Pintu Penama Antarabansa (PMA) Tebedu ba garis entara menua Sarawak - Kalimantan, Indonesia kena 11 Mac 2021," ku iya.
Uggah ti mega Chairman Komiti Mutarka Penusah
Ngenyit Nengeri Sarawak (JPBNS) mansutka pekara nya ba aum pengarang berita COVID-19 Sarawak ti diatur ba Begunan DUN Lama ditu, kemari.
Ku iya, asil ari peresa tumu raban JIM ti nyempulang PATI ke diburu pansut iya nya negatif tang pengawa meresa silik semua raban JIM enggau orang ke ditan ba Depot Imigresyen Semuja, Serian udah dipejalaika dikena nentuka ari ni kes nya berampit.
Asil ari meresa semua pemesai enggau orang ke ditan ba depot nya kena 16 enggau 17 Mac 2021 bisi 584 individu udah diperesa.
"Ari penyampau nya (584 individu) bisi 99 kes udah ditemu positif COVID-19 nyengkaum kes indeks; 185 kes udah ditemu negatif enggau 300 kes agi nganti pemutus.
"Naka ke diatu, sida ti ditemu positif COVID-19 iya nya semin orang ke ditan aja sereta nadai bekaul enggau raban JIM.
"Semua 99 kes tu udah diserara sereta dipasukka ba PKRC ti udah dibuka enggau beoperasyen dalam depot nya empu kena nyerara enggau ngubat sida," ku iya.
Berebak enggau tu iya madahka JKNS deka nambahka kapsiti meresa ba palan Depot Tahanan enggau Rumah Jil berindik ari kemari ngerikodka 99 kes psotif COVDI-19 diripotka ba Depot Tahanan Imigresen Semuja, Serian.
Nambahka nya, Uggah madahka Kluster Sungai Atap, Meradong iya nya kluster komuniti ti bekaul enggau pejalai meraka pelilih menua iya nya pun berampit ari Pelilih Menua Sibu.
"Kluster Sungai Atap, Meradong iya nya kluster komuniti ti bekaul enggau sebuah rumah panjai ba Sungai Atap, Ulu Strass ba Pelilih Menua Meradong, Sarikei.
"Indeks kes kluster tu iya nya kes Ke-10,693 siku indu peranak menua (Sarawak) beumur 36 taun ti ditemu ari pengawa meresa ba Klinik Pengerai Lanang, Sibu laban diasuh pengaji iya. Kes ditemu positif COVId-19 kena 5 Mac 2021.
"Asil ari pansik enggau pengawa nyidi kontak semak kes tu bisi 148 individu udah diperesa ti nyengkaum 19 kes udah ditemu positif COVID19 nyengkaum kes indeks; 125 kes udah ditemu negatif enggau empat kes agi nganti pemutus," ku iya sereta semua 19 kes positif udah dipasukka ba Sepital Sarikei enggau PKRC Sarikei.
Enggau penambah dua kulster baru kemari, nya ngujungka penyampau semua kluster COVID-19 agi aktif di Sarawak bisi 34 kluster.
Sama bisi ba aum pengarang berita nya, Menteri Kaunsil Kandang Menua enggau Pengawa Berumah Dato Sri Dr Sim Kui Hian enggau Direktor Opis Pengerai Nengeri Sarawak Dr Chin Zin Hing.