Pengeluar pemakai diperansang ngerebut peluang dagang di S’pura
KUCHING: Opis Dagang enggau Dagang Temuai Sarawak-Singapura (STATOS) minta raban ti ngeluarka produk pemakai enggau chara besai enggau mit, ngerejista produk sida ba ejensi nya sereta ngerebut peluang dagang di republik nya.
Ketuai Pemesai Eksekutif STATOS Chiew Chang Guan madah, tu berindik ari pengimport pemakai Singapura nyata amat rindu ke produk ti agi baru ke udah diproses ari Sarawak.
Iya mega madahka pengingin makai utai empa peranak Sarawak enggau Singapura sebaka.
“Tu mih kebuah STATOS meransang pengeluar produk pemakai ti bepangkalan di Sarawak betanya ngagai kami sereta ngerebut peluang dagang di Singapura nengah bantu dagang ti enda bebayar ti sediaka kami .
“Kami mega besemaya bekerejasama sereta mantu kompeni ari Sarawak ti bisi ati nempa pemujur ba renggat antarabansa,” ku iya nengah penerang kena Hari Empat tu tadi.
Servis ejensi nya nyengkaum mantaika orang dagang Sarawak ti proaktif ngagai pemeli enggau pengimport ke bisi potensial ari Singapura kelimpah mantu ngambika produk ke bisi diatu dieksport lalu diterima ba makit dagang.
“Pengawa ngeksport ngagai menua bukai engka maya keterubah bisi mar mimit, nya alai tu mih kebuah STATOS deka mantu kompeni di nengeri Sarawak tama ngagai makit dagang antarabansa. Kami ulih mantu mutarka penanggul eksport tu.
“Dagang pemakai mega patut nemu bansa produk ti dikerinduka di Singapura tauka peluang kerejasama. Kami sedia mantu enti kita ngerejista diri dulu ba ejensi tu,” ku iya.
Ku Chiew, pengudah pejalai nengah langit dikemendarka, STATOS deka nampung baru pengawa nengah chara mai pengimport ari Singapura ke Sarawak ngambika betemu enggau orang dagang ti udah ngerejista diri STATOS, ngelawa kilang tauka palan alai ngemansutka produk sereta berandauka peluang bekerejasama.
Ku iya, naka ke diatu sida bisi peminta ke tinggi ari sukut penyemaka dagang nengah online ungkup kompeni di Sarawak, ngambika betemu enggau pemeli ke bisi potensial, meri jaku tangkan bekaul meri setipikit ngagai produk,nyual,proses dagang di Singapura, webinar enggau sesi baka ni nentuka produk sedia dieksport.
Berebak enggau nya, STATOS enggau Federasyen Dagang Sarawak deka ngatur webinar ‘Usaha Eksport Produk Makanan Sarawak Ke Singapura - Apa Yang Anda Perlu Tahu’ kena 28 April u ila.
Penerang silik bekaul nya tau dipeda ba website rasmi STATOS ba www.statos.com.sg. — Bernama