Pemeri subsidi telefon pintar amat patut sereta ngena ba maya iya
KUCHING: Subsidi RM300 kena meli telefon pintar ari baruh 'Program Jaringan Prihatin' ungkup ruang bilik ti agi bisi anak besekula endang patut amat.
Tinjau Utusan Borneo beratika ruang bilik ke agi bisi anak besekula nyambut manah pemeri subsidi ti ditambah manah perintah nya.
Abang Abdul Aziz Abang Draup madah, pengawa perintah nambah manah subsidi kena meli telefon pintar tu endang amat patut sereta ngena ba maya iya.
“Pemeri subsidi tu ulih ngurangka tating pengidup rayat kelebih agi raban B40 ti agi bisi anak besekula lebih ari siku.
“Kelebih agi maya pandemik COVID-19 diatu, telefon pintar endang beguna amat kena bala an ak nitihka sesi ngajar enggau belajar di rumah.
“Enggau pemisi subsidi tu, nya ulih mantu apai indai ti kurang penatai pemisi meli telefon pintar nitihka pengulih sida ke bala anak ti agi besekula,” ku iya.
Berebak enggau nya, Kolvincoren Jihem madahka subsidi RM300 udah tentu ulih mantu ngelempungka tating belanja apai indai meli telefon pintar ngambika bisi dikena anak sida.
“Aku nyambut manah subsidi tu enggau penambah manah ti digaga perintah nengah Program Jaringan Prihatin tu.
“Enggau pemisi subsidi sereta penambah manah servis Internet, tu ulih ngerapitka seraka digital kelebih agi ba ruang bilik B40,” ku iya.
Ba Erwina Nissen, iya madahka subsidi tu beguna amat ba ruang bilik ti kurang penatai pemisi sereta mayuh anak ke agi besekula.
Nengah pemeri subsidi, nya tau dikena apai indai meli sereta nambahka telefon pintar ke anak sida kena nithka kelas sechara online maya pandemik tu.
“Taja pia, perintah mesti nentuka Internet ulih diakses enggau manah kelebih agi di menua pesisir enggau ulu entigis.
“Enti nadai bungkur Internet ke manah, subsidi tu enggau semua Program Jaringan Prihatin tu nyadi nadai reti,” ku iya.