PERAIS nerima manah langgur perintah nikika gaji maksimum penerima bantu EPC
KUCHING: Persatuan Anak Istimewa Sarawak (PERAIS) nerima manah langgur perintah nikika tikas pematut gaji maksimum penerima bantu Elawin Pekereja Nyelai Pendiau (EPC) ari RM1,200 ngagai RM1,500.
Presiden serakup nya Rapelson Richard Hamit madah, taja pia PERAIS ngarapka perintah berunding nikika tikas maksimum nya ngagai RM2,000,iya nya ba ikas penyeranta di Malaysia.
‘’Kebuah pia laban ba gaya ke diatu, penatai pemisi ke baruh ari RM2,000 endang ba baruh tikas penyeranta lalu ditambah agi enggau ungkus pengidup ke majak tinggi kelimpah ari pandemik
COVID-19,’’ ku iya nengah siti penerang,kemari.
Kena Hari Dua,Menteri Besai Tan Sri Muhyiddin Yassin maya madah ba pesan Program Strategik Negapka Rayat enggau Ekonomi (PEMERKASA) bisi madahka tikas pematut gaji maksimum ungkup bantu Elawin Pekereja Nyelai Pendiau (EPC) deka ditikika ari RM1,200 ngagai RM1,500 sebulan kena mantu raban OKU ti bekereja ke sama ngasaika pemar ba maya ke diatu.
Menteri Besai Tan Sri Muhyiddin Yassin madah, inisiatif ti mungkur ungkup belanja RM26 juta nya deka meri pemaik ngagai 5,000 orang timpang pendiau (OKU) di menua tu.
Perintah Besai mega setuju nambah RM20 juta kena negapka program ari baruh institusyen dikuasa Opis Menteri Pemansang Orang Indu, Ruang Bilik enggau
Raban Bansa.
Ku Rapelson, PERAIS mega nyukung langgur Perintah Besai meri peluang ngagai raban OKU ngerejista sereta ngemaruka dagang sida nengah Suruhanjaya Syarikat Malaysia (SSM) ke enda bebayar ngambi nyadi ke peransang ngagai sida ngaul diri dalam pengawa dagang.
‘’Kelimpah ari nya, Bank Simpanan Nasional (BSN) megabisinyendiakaRM25juta ari baruh ‘Skim Mikrokredit Istimewa’ ungkup raban OKU ngambika ngaul diri ba pengawa dagang enggau penyampau nyentuk RM50,000 lalu bungai tiga peratus nengah Program PEMERKASA tu,’’ ku iya.