ADUN patut ngena memanah agih belanja MRP rayat
Agih tu enda salah dikena, ADUN ngembuan tanggungpengawa nentuka penyampau agih belanja nitihka peminta JKKK
TATAU: Menteri Muda ba Opis Kepala Menteri (Undang-Undang enggau Adat Bumiputera) ke mega Kaban Kunsil Nengeri (ADUN) Kakus Datuk John Sikie Tayai madahka jaku tuduh bekaul pengawa salah nguna agih belanja Projek Mit Menua Pesisir (MRP) ari ADUN tu enda amai.
Ku iya madah, agih belanja nya enda salah kena tang sida semina nentuka penyampau agih belanja ungkup tetiap projek tu bepelasarka peminta ari Komiti Pemansang enggau Pengelikun Genturung Pendiau (JKKK).
“Tetiap peminta projek ti mujur dikemendar deka dipatau ari Opis Kereja Raya (JKR), Opis Residen enggau Pelilih Menua ngambika pengawa ti dipejalaika nya nitihka spesifikasyen ke udah ditetapka,” ku iya kemari lebuh ti ngulu program meresa ke taba projek Program Transformasyen Menua Pesisir (RTP) DUN Kakus kemari.
Berindik ari nya ku Sikie madah, projek RTP ba sitak
Kakus nyengkaum ari baruh pegai opis Bagi Menua Sibu enggau Mukah dipejalaika nengah proses nyabut undi.
Taja pan projek RTP tu ulih dipejalaika enggau chara beripai tang, ku iya, muntang agi ngagai JKR, Opis Pelilih Menua enggau Opis Residen matau sereta ngemataka nyema prjek dipejalaika ari raban kunteriktor ke udah dipilih nengah proses bechabut undi.
Ku iya nerang, ungkup bejalaika projek RTP, tetiap sitak DUN udah diagihka RM5 juta, tang penyampau nya enda umbas berindik ari bisi sitak DUN ti besai deka dikemansangka.
Pia mega, ku iya nambah, kemari bisi semilan palan projek RTP 2021 ke udah dikemata sereta dilawa sida begulai enggau raban ari JKR Bagi Menua Bintulu.
“Program ngelawa ke sama mega deka dipejalai ngagai sitak ke bukai begulai enggau JKR sereta Palan Servis Komuniti DUN Kakus kena nentuka projek dipejalai enggau manah,” ku iya nambah.
“
Tetiap peminta projek ti mujur dikemendar deka dipatau ari Opis Kereja Raya (JKR), Opis Residen enggau Pelilih Menua ngambika pengawa ti dipejalaika nya nitihka spesifikasyen ke udah
” ditetapka.
Datuk John Sikie Tayai
Menteri Muda ba Opis Kepala Menteri (Undang-Undang enggau Adat Bumiputera)
Program ngelawa ke taba projek RTP 2021 nya kemari dipejalai ari pukul 9 pagi nyentuk 5 lemai ti ngaul taba
projek ngaga baru jalai, ngelandaika taba berumah panjai sereta ngangkatmanah jalai ke Rumah (Rh) Sigan Renggi,
Rh Was Janteng, Rh Berain Jipun, Rh Kallang Arah, Rh Das Nyanggau, Rh Juni Linnyan, Rh Indai Tuai Unbam,
Rh Jiram Sain, Rh Janting Juat sereta Rh Enchana.
Sama bisi dalam program nya Pemangku Pemesai Opis
Pelilih Tatau Calvin Ligong sereta Injinir Perintah JKR Bagi Menua Bintulu Natasha Landan.