COVID-19: Sarawak ngerikodka 303 kes baru positif, siti kes pemati kemari
KUCHING: Sarawak ngerikodka 303 kes positif baru COVID-19 enggau siti kes pemati baru ketegal rampit COVID-19, kemari.
Sapit Kepala Menteri, Datuk Amar Douglas Uggah Embas madahka, nya nyadika penyampau semua kes COVID-19 ba Sarawak nambah nyadi 13,413 kes.
"Sehari tu bisi 303 kes baru COVID-19 ditemu enggau diripotka ba Sarawak.
"Pelilih menua ti ngeripotka kes iya nya Pelilih Menua Serian (101), Bintulu (57), Sibu (47), Miri (27), Meradong (13), Kapit (10), Julau (9), Kuching (8), Sarikei (8), Sri Aman (6), Tanjung Manis (5), Bukit Mabong (4), Sebauh (2), Bau (1), Belaga (1), Kanowit (1), Samarahan (1), Selangau (1) enggau Subis (1).
"Ari penyampau semua (303) kes baru tu nyengkaum 153 kes asil ari meresa individu ke bisi kontak kes positif COVID-19 (lapan iku bisi tanda); 123 kes asil meresa individu dalam kluster aktif ke udah bisi (nadai orang bisi tanda); 20 kes bukai beperesa ba fasiliti pengerai (siti kes bisi tanda); enam kes iya nya meresa individu bisi tanda ba fasiliti pengerai enggau siti kes bekaul individu pulai ari nengeri bukai dalam malaysia ti dikategori kes Import B," ku iya.
Uggah ti mega Chairman Komiti Mutarka Penusah Ngenyit Nengeri Sarawak (JPBNS) mansutka pekara nya ba aum pengarang berita COVID-19 Sarawak ti diatur ba Bengunan DUN Lama ditu, kemari.
Bekaul enggau Pelilih Menua Serian ti ngerikodka pemadu mayuh kes positif baru COVID-19 kemari, iya madahka ari 101 kes ke dirikodka nya nyengkaum 99 kes bekaul enggau Kluster Depot Imigresen Semuja enggau dua kes iya nya individu diperesa nengah pengawa meresa enggau aktif kontak kes positif COVID19.
Dulu ari nya lebuh ti ngenang siti kes pemati baru ketegal rampit COVID-19, ku iya, tu ngujungka penyampau semua pemati ba nengeri tu bisi 95 iku.
"Kes pemati ke-95 iya nya kes Ke-8,033 siku indu peranak menua (Sarawak) beumur 58 taun ti udah diperubatka ba Sepital Sibu laban bisi tabin, batuk, enda ulih ensium bau utai enggau lemi tubuh.
"Asil meresa ujian rT-PCR iya nya ditemu positif kena 21 Februari 2021. Tikas pengerai kes manah enda manah enggau ditetapka udah nadai kena 17 Mac 2021. Kes tu nadai ko-morbid.
"Komiti Mutarka Penusah Ngenyit Nengeri Sarawak meri penyinu ati ngagai semua orang ke sebilik enggau kes," ku iya
Kelimpah ari kemari diripotka bisi 206 kes baru udah gerai sereta dikemendarka pansut ari Sepital Sibu (51), Sepital Miri (35), Sepital Besai Sarawak (28), PKRC Sepital Kapit (24), Sepital
Bintulu (21), Sepital Sarikei (19), PKRC Betong (15), PKRC Sri Aman (8), PKRC Serian (4) enggau PKRC Mukah (1).
Tu nyadika penyampau semua kes positif COVID-19 udah gerai sereta dikemendarka pansut ari sepital naka kemari bisi 10,838 iku tauka 80.80 peratus ari penyampau semua kes ba Sarawak, ku iya.
Kemari mega bisi 304 PUI baru diripotka enggau dua PUI ti agi nganti pemutus makmal.
Sama bisi ba aum pengarang berita nya kemari Menteri Kaunsil Kandang Menua enggau Pengawa Berumah Dato Sri Dr Sim Kui Hian enggau sida ke bukai.