11 kompeni bas di Sarawak nerima bantu RM5.6j
MIRI: Agih belanja sepenyampau RM5.6 juta ari perintah besai deka diberi ngagai 11 kompeni bas di Sarawak nengah Dana Bantuan Sementara Penguasaha Bas Berhenti-Henti (DBSPB) ungkup taun 2021 enggau 2022.
Sempekat nerima agih belanja tu udah disain entara Direktor Kaunsil Lisin Perengka Pengangkut Dagang (LPKP) Sarawak Razami Mohamad Jamali enggau bala pengempu kompeni bas ti dikemataka Menteri Perengka Pengangkut Datuk Lee Kim Shin dalam program nyain sempekat DBSPB ke diatur ba Opis residen Miri, kemari.
Sama bisi iya nya Kaban Kunsil Nengeri (ADUN) Lambir Ripin Lamat, Pemangku Residen Bagi Menua Miri Abdul Aziz Mohd Yusuf sereta bala Direktor LPKP.
LPKP Sarawak enggau Opis Menteri Perengka Pengangkut Sarawk nengah siti penerang media madahka 11 kompeni ti bulih nerima agih belanja tu iya nya Petra Jaya Transport (S) Sdn Bhd, Biaramas Express Sdn Bhd, Bau Transport Company Sdn Bhd, City Public Link Bus Services Sdn Bhd, Lanang Road Bus Company Berhad, Rejang Transport Sdn Bhd, Sungei Merah Bus Berhad, Teku Road Bus Co Sdn Bhd,
Miri Transport Co Sdn Bhd, Miri City Bus Sdn Bhd sereta Miri Belait Transport Company Sdn Bhd.
DBSPB ke suba nya dikumbai Interim Stage Bus Support Fund (ISBSF) udah dimunka Opis Perengka Pengangkut Mensia Mayuh Darat (SPAD) ba taun 2021 lalu majak dikemanah nengah sempekat entara perintah besai iya nya ari Opis Menteri Perengka Pengangkut enggau kompeni bas ngetu.
“DBSPB ukai semina ungkup tuju ngangkatka kualiti servis bas ngetu tang mega ungkup tuju ngubah manah runding sereta tikas pechaya orang tambang ngagai tikas pemanah servis perengka pengangkut mensia mayuh di Sarawak.
“Berindik ari nya, dalam pengawa kena nyapai sistem servis bas ti betikas dunya, endang patut ngagai perintah nyukubng kompeni bas ngetu tu kena nentuka sida ulih meri servis enggau manah dalam industri perengka pengangkut mensia mayuh,” ku penerang nya.
Kelimpah ari nya, DBSPB mega kena mutarka pengerugi dalam operasyen ninting hari raban pengempu bas ngetu kena nentuka sida meri servis ti meruan, meransang sida mulaika pemanah pejalai ke udah diketuka servis lalu meransang sida ngambika nambahka penyuah pejalai sereta pengawa nyeruri bas.
“Program tu ngaul 50 pejalai di selampur Sarawak iya nya 18 pejalai tu di Kuching, 18 di Sibu lalu 14 di Miri.
“Tu mega nyadika tipak ngagai Program Tambang Bas RM1 ke dipejalai perintah Sarawak ari baruh Subsidi Perengka Pengangkut Mensia Mayuh di Kuching, Miri enggau Sibu,” ku iya.
Program tambang bas RM1 tu udah dipejalai di Sarawak berengkah bulan Mei 2020 nyentuk bulan Disember 2020, lalu udah nyapai penyampau ti digumpul ungkup pemayuh orang tambang iya nya bisi 1.22 juta lalu bisi RM5.2 juta udah dipelanja perintah Sarawak kena mayar subsidi ngagai 12 kompeni bas.
“Laban sambut ti manah ari orang tambang, program subsidi tu diteruska taun tu lalu pemayuh orang ti ngena bas ngetu tu kena bulan Januari 2021 iya nya bisi 186,512 iku ti ngaul penyampau subsidi iya nya RM751,530.
“Ba penyampau semua nya, penyampau ti digumpul pemayuh orang tambang bas ngetu dalam timpuh semilan bulan berengkah ari bulan Mei 2020 nyentukka bulan Januari 2021 iya nya bisi 1.418 juta ti ngaul penyampau subsidi iya nya RM5.99 juta,” ku iya nambah.