Trend kes COVID-19 ba rumah panjai bisi nurun: Uggah
Penyampau rumah panjai ti nadai agi dipejalaika atur nagang pemindah tauka ‘lockdown’ udah majak kurang
“
Dalam timpuh ti sama mega, bisi 320 buah rumah panjai udah di lockdown dikena nagang COVID-19 berampit. Nyentuk sehari tu semina bisi 56 buah rumah panjai agi di lockdown. Ke bukai, iya nya 264 buah rumah panjai nadai agi dipejalaika lockdown pengudah ditemu pengelekai tauka rampit COVID-19 ulih
” dijaga.
Datuk Amar Douglas Uggah Embas
Sapit Kepala Menteri
KUCHING: Kes COVID19 ba rumah panjai ngayanka trend kes nurun tauka kurang, pia ku Sapit Kepala Menteri Datuk Amar Douglas Uggah Embas.
Iya ti mega Chairman Komiti Mutarka Penusah Ngenyit Nengeri Sarawak (JPBNS) madahka pemayuh rumah panjai ke nadai agi dipejalaika atur nagang pemindah tauka ‘lockdown’ udah majak kurang.
“Pia mega ba rumah panjai di Sarawak, udah ngayanka trend ti nurun.
“Dalam timpuh ti sama mega, bisi 320 buah rumah panjai udah di lockdown dikena nagang COVID-19 berampit. Nyentuk sehari tu semina bisi 56 buah rumah panjai agi di lockdown. Ke bukai, iya nya 264 buah rumah panjai nadai agi dipejalaika lockdown pengudah ditemu pengelekai tauka rampit COVID-19 ulih dijaga,”
ku iya.
Uggah mansutka pekara nya ba aum pengarang berita COVID-19 Sarawak ti diatur ba Begunan DUN Lama ditu, kemari.
Berebak enggau tu Uggah terus ngelalau mensia mayuh ngambika terus ngemeran sereta ngemeratka takah fizikal enggau seruran ngena sengkabung idung enggau nyawa tauka pelindung mua ba palan mensia mayuh.
Kelimpah ari nya lebuh ti ngenang pasal kluster aktif COVID-19 ba nengeri tu, iya madahka, bisi 34 kluster.
Ari penyampau semua 34 kluster aktif nya, ku iya, bisi 11 kluster bisi ngayanka penambah kes sereta 23 kluster nadai ngayanka penambah kes kemari.
Entara kluster ti pemadu mayuh nambah kes kemari iya nya Kluster Depo Imigresyen Semuja, Serian, bisi 146 penambah kes.
Bekaul enggau kluster tu bisi 592 individu udah diperesa lalu ari penyampau nya bisi 245 kes udah ditemu positif COVID-19 nyengkaum kes indeks; 210 individu ditemu negatif enggau 137 individu nganti pemutus makmal.
“(Kemari) Pelilih Menua Serian ngerikodka 140 kes iya nya pemadu mayuh ke baru sereta ari penyampau nya bisi 138 kes individu diperesa bekaul enggau Kluster Depo Imigresyen Semuja. Kes nadai ngayanka sebarang tanda,” ku iya.
Kelimpah ari nya siti kes (ari 140 kes baru pelilih menua Serian kemari) iya nya individu diperesa nengah pengawa nyidi ti dipejalaika enggau aktif kontak kes positif COVID-19 sereta dikategori kes berampit ba pelilih menua tu enggau nadai seberang tanda.
Lalu siti agi kes (ari 140 kes baru pelilih menua Serian kemari) iya nya asil meresa staf pengerai ba Pelilih Menua Serian ti dikategori nyadi kes Import C ari Kuching sereta nadai ngayanka sebarang tanda.