COVID-19: 407 kes baru positif dirikodka di Sarawak kemari
KUCHING: Sarawak kemari ngerikodka kes COVID-19 pemadu mayuh dalam rikod ninting hari iya nya 407 kes positif baru COVID-19.
Sapit Kepala Menteri Datuk Amar Douglas Uggah Embas madahka, nya ngujungka penyampau semua kes ba nengeri tu nambah nyadi 13,820 kes.
Ku iya ari 407 kes baru nya nyengkaum 221 kes iya nya meresa individu dalam kluster aktif ke udah bisi (lima iku bisi tanda); 161 kes asil meresa individu ti bisi kontak kes positif COVID-19 (15 iku bisi tanda); enam kes asil meresa individu bisi tanda ba fasiliti pengerai enggau 19 kes iya nya asil ari beperesa bukai ba fasiliti pengerai (dua iku bisi tanda).
“Sehari tu penyampau kes positif ti pemadu mayuh iya nya 407 kes baru COVID-19 ditemu ba Sarawak.
“Pelilih Menua ti ngeripotka kes iya nya Pelilih Menua Serian (140), Sibu (65), Miri (49), Betong (40), Bintulu (26), Sri Aman (23), Kuching (19), Samarahan (11), Kapit (10), Song (6), Subis (5), Meradong (4), Lundu (3),
Julau (2), Kanowit (2), Dalat (1) enggau Limbang (1).
“Ari 407 kes (baru positif COVID-19), bisi 138 iya nya bekaul enggau orang ke ditan ba Depo Imigresyen Semuja,
Serian. Kandang endur tu dijaga sereta tutup. Semua sida udah diengkah ba PKRC Depo Tahanan Semuja, Serian,” ku iya, kemari.
Uggah ti mega Chairman
Komiti Mutarka Penusah Ngenyit Nengeri Sarawak (JPBNS) mansutka pekara nya ba aum pengarang berita COVID-19Sarawaktidiaturba Begunan DUN Lama ditu.
Bejaku baru iya madahka kes ba Sibu, Betong, Kuching, Bintulu enggau Kapit udah ngayanka trend kurang kes dalam minggu tu.
Berebak enggau tu mega Uggah madahka kemari bisi 183 kes baru ti udah gerai sereta dikemendarka pansut ari Sepital Sibu (74), Sepital Besai Sarawak (35), Sepital Bintulu (28), Sepital Sarikei (17), PKRC Sepital Kapit (8), Sepital Miri (8), PKRC Betong (7), PKRC Mukah (5) enggau PKRC Serian (1).
“Tu ngujungka penyampau semua kes positif COVID-19 ke udah gerai sereta dikemendarka pansut hari sepital naka sehari tu bisi 11,022 iku tauka 79.75 peratus ari penyampau semua kes COVId-19 ba Sarawak,” ku iya.
Kemari mega bisi 411 PUI baru udah diripotka enggau nadai PUI ti nganti pemutus ujian makmal.
Sama bisi ba aum pengarang berita nya kemari Menteri Kaunsil kandang Menua enggau Pengawa Berumah Dato Sri Dr Sim Kui Hian enggau Direktor Opis Pengerai Nengeri sarawak Dr Chin Zin Hing.