Siti kes pemati ketegal COVID-19 ngaul siku lelaki beumur 55 taun

KUCHING: Bisi siti kes pemati baru dirikodka ketegal rampit COVID-19 ti bekaul enggau siku lelaki beumur 55 taun.

Sapit Kepala Menteri Datuk Amar Douglas Uggah Embas madahka, nya ngujungka penyampau semua kes pemati ketegal rampit COVID ba nengeri tu nambah nyadi 96 iku.

“Kes pemati ke 96 iya nya kes ke-9,349 siku lelaki peranak menua (Sarawak) beumur 55 taun.

“Kes ditemu positif COVID-19 ngena ujian rT-PCR meresa COVID-19 kena 27 Februari nengah aktiviti ACD ba kandang endur berisiko tinggi.

“Gaya pengerai kes majak enda manah enggau ditetapka udah nadai kena 18 Mac 2021. Kes nadai ngembuan ko-morbid,” ku iya ti mega chairman Komit Mutarka Penusah Ngenyit Nengeri Sarawak (JPBNS).

Uggah mantaika pekara nya ba aum pengarang berita COVID-19 Sarawak ti diatur ba Bengunan DUN Lama ditu, seraya iya disempulang

Menteri Kaunsil Kandang Menua enggau Pengawa Berumah Dato Sri Dr Sim Kui Hian enggau Direktor Opis Pengerai Nengeri sarawak Dr Chin Zin Hing, kemari.

Berebak enggau tu iya madahka komiti (JPBNS) meri penyinu ati ngagai orang ti sebilik enggau kes.

Kelimpah ari nya Uggah madahka kemari Pelilih Menua Sri Aman betukar ngagai ststua Mirah.

Nya alai naka kemari bisi 12 pelilih menua bestatus Mirah iya nya Song, Serian, Subis, Julau, Betong, Meradong, Kuching, Kapit, Bintulu, Miri enggau Sibu kelimpah ari Sri Aman.

“Sehari tu (Kemari), Pelilih Menua Sri Aman udah betukar status ari Oren ngagai status Mirah pengudah ngerikotka sepenyampau 49 kes berampit ba pelilih menua tu dalam timpuh 14 hari ke udah,” ku iya.

Kelimpah ari nya, tiga pelilih menua agi ba status Oren, 16 pelilih menua agi ba status Kuning enggau semilan agi ba ststus gadung.