Subsidi telefon pintar ari PJP meri pengelantang ngagai raban B40
KUCHING: Inisiatif subsidi meli telefon pintar ari baruh Program Jaringan Prihatin (PJP) ti diberi sepenyampau RM300 ungkup B40 ke bisi anak besekula diadang ulih ngelempungka penanggul belanja apai indai.
Berindik ari pekara nya Gempung Gerempung Pengajar Bumiputera Sarawak (KGBS) ti betuaika presiden iya Ahmad Malie nyambut manah inisiatif ti dipejalaika perintah nya.
“KGBS nyambut manah inisiatif subsidi RM300 dikena meri peranti baru tauka telefon pintar ungkup sida ti patut nerima Bantuan Prihatin Rakyat (BPR) baka ti dipadah YAB Menteri Besai maya mantaika Insentif Pemerkasaan apin lama.
“Enggau pemeri subsidi tu KGBS arap bendar ulih ngelempungka penanggul belanja apai indai dikena meli peranti ti setipak dikena napi guna anak sida.
“KGBS mega madahkainisiatif subsidi tu nyadi singkang pengepun perintah nentuka iya nya semua rayat enda ngira tikas sosioekonomi sida ngembuan peranti ti dikena anak belajar,” ku iya madah ngagai Utusan Borneo.
Ahmad meri penerang nya lebuh ti ngenang pekara ti dibantaika Menteri Besai Tan Sri Muhyiddin Yassin iya nya perintah ngemanahka agi subsidi meli telefon pintar ari baru Program Jaringan Prihatin ti meri RM300 ngagai ruang bilik ti bisi anak besekula dalam pengeran deka ngerapitka takah digital raban B40.
“Nya alai KGBS ngarapka apai indai ulih ngena inisiatif subsidi tu enggau chara ti manah, ke penguntung tauka pemanah pelajar anak sida ti begunaka kereban nya,” ku Ahmad.
Kelimpah ari nya, Ahmad mega madah KGBS nyambut manah pengeran perintah bejalai inisiatif ngurangka takah digital entara rayat sereta enggau juluk nentuka lebih matuh rayat ulih akses ngagai bungkur arus internet.
Ku iya KGBS ngarapka inisiatif ulih nyadi nyata enggau lengkas dikena napi peminta guna rayat ti seruran ngarapka bungkur internet ti manah seraya ulih ngangkatka tikas idup sosioekonomi nyentuk renggat dunya.
“KGBS arap bendar enggau pemujur inisiatif tu dipejalaika udah tentu deka mai penguntung setipak enggau pengeran perintah ngemansangka rayat ti ngembuan teknologi tinggi setipak enggau pemansang dunya,” ku iya.
Lebuh mantaika inisiatif nya, Menteri Besai madah ungkup belanja Program Jaringan Prihatin mega ditambah ngagai RM2 billion sereta deka dipenyadi ba bulan Mei tu.
“Aku minta kompeni telekomunikasyen nyendiaka pakej Internet ulih dibeli (mampu milik) enggau terus nyendiaka kuota data tambah,” ku iya maya mantaika penerang khas bekaul enggau Program Strategik Memperkasa Rakyat dan Ekonomi (PEMERKASA) sepenyampau RM20 bilion apin lama.
Sebedau tu perintah kala madah subsidi telefon pintar sepenyampau RM180 ungkup semua penerima BPR dalam Belanjawan 2021.