JPBB Miri mutuska sesi besekula di Miri ditangguhka baru
MIRI: Pengawa muka sesi sekula betunga mua ungkup sekula primari di Miri udah ditangguhka agi ngagai timpuh seminggu lalu dipelaba deka dibuka kena 5 April ti deka datai pengudah kemisi sekula penggal keterubah.
Pemutus nya udah digaga Komiti Mutarka Penusah Ngenyit Bagi Menua (JPBB) Miri kemari, pengudah ngatur aum begulai enggau Opis Pengerai Bagi Menua Miri enggau Sepital Miri bekaul enggau gaya ti pemadu baru COVID-19 ba Miri.
Menteri ti Megai Tanggungpengawa JPBB Miri Datuk Lee Kim Shin dalam penerang media madahka, pemutus nya digaga ketegal penyampau kes COVID-19 ti agi majak nambah lalu bisi 88 kes udah dirikodka kena 17 Mac iya nya kes ti pemadu tinggi ba
Sarawak kenaka hari nya.
“Dalam timpuh lima hari kenyau ari Hari Minggu nyentukka Hari Empat, Miri udah ngerikodka penambah kes iya nya 209 kes. Ari penyampau nya, bisi 19 tauka semilan peratus kes positif iya nya ari nembiak sekula primari enggau sekondariseretapengajarmega, lalu 55 iku udah ditemu nyadi kontak semak ti ngaul nembiak sekula primari enggau sekondari sereta bala pengajar.
“Aku udah ngeripotka pekara tu ngagai Komiti Mutarka Penusah Ngenyit Nengeri Sarawak (JPBNS) lalu udah berandau enggau silik begulai enggau Pemesai Pelajar Pelilih Menua Miri, lalu aum nya udah ngemutuska deka nangguhka pengawa muka sesi sekula primari di Miri ungkup timpuh seminggu agi.
“Tu lalu ditangkanka enggau kemisi sekula penggal keterubah. Nyadi reti nya pengawa muka sesi sekula ungkup Pelilih Menua Miri deka dibuka sereta enggau sekula sekondari iya nya kena 5 April 2021,” ku iya nerang.
Pemutus tu mega, ku Lee ti mega Menteri Perengka Pengangkut udah digaga berindik ari Miri agi ba tikas bejejaga lalu dalam Zon Mirah.
Pia mega ungkup Pelilih Menua Subis, sesi besekula deka dipejalaika kena Hari Satu ti deka datai baka ti udah dipadahka laban gaya ba Subis tu manah agi ti ngerikodka semina siti kes positif.
Beserimbai enggau nya, Lee mega minta apai indai ngambika meri kerejasama dalam pengawa ngurangka kes COVID-19 ditu.