MOTAC teus ngenegapka kerejasama enggau perintah nengeri, ku Nancy
Dalam ngemansang, ngidupka baru sektor dagang temuai domestik di Sarawak
LIMBANG: Perintah besai nengah Opis Menteri Dagang Temuai, Seni enggau Main Asal Malaysia (MOTAC) deka terus ngenegapka kerejasama enggau perintah nengeri dalam ngemansangka sereta ngidupka baru sektor dagang temuai domestik di Sarawak.
“
Perintah nengeri patut ngelangkar sereta ngaga pelin pemansang ekonomi dagang temuai enggau ngenukuka produk dagang temuai domestik ke bisi.
Datuk Seri Nancy Shukri
Menteri MOTAC
Menteri MOTAC Datuk Seri Nancy Shukri madah, juluk tu seriris enggau Polisi Dagang Temuai Menua (DPN) 2020-2030 ti dimunka bulan Disember taun nyin kemari dalam nyamin industri dagang temuai menua ti meruan.
Ku iya nerang, ari baruh DPN Malaysia deka numbuhka zon betanam puku ungkup projek dagang temuai tauka ‘Special Tourism Investment Zones’ kena ngenyakahka agi kerejasama perintah-peribit sereta narit mayuh agi penanam puku di menua tu enggau menua luar.
“Perintah nengeri patut ngelangkar sereta ngaga pelin pemansang ekonomi dagang temuai enggau ngenukuka produk dagang temuai domestik ke bisi.
“Perintah besai deka nyukung ari sukut buah runding sereta agih belanja Atur Pemansang Melaysia lalu kerejasama tu deka dichakahka agi,” ku iya lebuh ti ditemu media maya ngelawa ngagai Lumpur Bebuak Kampung Meritam kemari.
Sama nyempulang iya
Sapit Menteri Perengka Pengangkut Datuk Hasbi Habibollah, Kaban Kunsil Nengeri (ADUN) Batu Danau Paulus Palu Gumbang, Ketuai Sekretari MOTAC Dato Dr Noor Zari Hamat, Pemesai Pelilih Menua Limbang Superi Awang Said, Ketuai Kunsilor Opis Kaunsil Pelilih Menua Limbang (MDL) Kunsilor Sufian Mohat enggau Sekretari MDL Petrick Linggie Taboh.
Iya ke mega Kaban Parlimen (MP) Batang Sadong madahka sektor dagang temuai domestik di Sarawak enda ulih bejalaika operasyen penuh ketegal kes COVID-19 ti agi tinggi.
“Di Sarawak kes agi mayuh lalu sida irau deka muka sektor dagang temuai.
“Nama ti pemadu beguna iya nya ngenukuka produk dagang temuai ke bisi di nengeri tu ke ulih nyadi pematak temuai ari menua luar,” ku iya.
Ku iya nambah, Sarawak udah besedia enggau produk dagang temuai kelebih agi produk dagang temuai gadung ti ulih matak penatai temuai.
Nitih ku iya, sekeda temuai ngembuan pengerindu ngelawa ke palan ti gadung lalu ngelarika diri ari palan ke dedat lalu merambu datai begulai enggau diri sebilik.
Ku iya nambah, opis menteri iya mega deka mantu ngenukuka produk dagang temuai menua pesisir di Limbang ti ngembuan mayuh macham palan ti narit ati, kelimpah produk pemakai ‘sup dadah’ (ikan tahai), sejarah, main asal enggau produk pengelandik jari.
Ku iya, semua produk dagang temuai tu mesti dikelaku ngambika temuai nemu ti mega nyadi pematak Limbang ke lalu ulih narit penatai temuai.