Komuniti dilalau enda ngaga pengawa nunu chara tebuka kelebih agi maya kemarau
SARIKEI: Komuniti dilalau ngambika enda ngaga sebarang pengawa nunu chara tebuka kelebih agi maya musin rangkai diatu.
Ketuai Balai Bomba enggau Penyelamat Sarikei Mahmudin Narudin madah, chara tu endang beguna kena nentuka nadai sebarang penusah tau nyadi.
“Kerejasama ari komuniti endang beguna dalam nyeliahka pengawa nunu chara tebuka kena nyaga rampa menua enggau mega reta tengkira.
“Berindik ari nya kitai ngarapka komuniti ulih nitihka atur lalu enda sepeneka ati ngaga pengawa nunu enggau chara tebuka,” ku Mahmudin ngagai media, bedau lama ti udah.
Bejaku bekaul enggau pengawa nyikap diri dalam betapi enggau sebarang bansa penusah ngenyit maya musin gaya hari ti panas tu, ku Mahmudin madah, Opis Bomba enggau Penyelamat Malaysia (JBPM) Sarikei seruran besedia napi musin kemarau.
“Ari sukut penyampau raban ti gawa, bisi 56 iku raban udah besedia dalam betapi enggau penusah angus maya musin kemarau tu.
“Ari penyampau nya bisi 23 iku iya nya pemesai bomba ti bekereja tetap, lalu 13 iku pemesai bomba bantu lalu 20 iku pemesai bomba volunteer.
“Berindik ari nya, mayuh macham pengawa latih udah dipejalaika raban bomba kena nentuka semua raban ti udah besedia ari sukut fizikal sereta mental,” ku iya.
Ku iya nambah, ari sukut logistik, bomba Sarikei udah nentuka nya seruran manah lalu ulih dikena lebuh ti bisi nyadi sebarang penusah ngenyit.
“Kena madamka angus ti nyadi ba babas tauka anugs asil ari pengawa nunu chara tebuka maya musin kemarau, bisi 48 hos udah disediaka.
“Kelimpah ari nya, kereban bukai ti disediaka iya nya empat ‘dividing breaching’, dua injin pam bansa ‘Godvida Pump GP 10/10’ lalu empat kereban kena madamka api udah disediaka raban bomba diatu,” ku iya.
Beserimbai enggau nya, ku iya, ari pun Januari 2021 nyentukka 14 Mac 2021, bisi enam penusah angus babas lalu dua penusah angus diripotka ngagai raban sida.
“Bisi enam palan endur penusah angus nyadi ba kampung, babas, lalang, kebun enggau uras ti udah ditemu ari taun 2019 nyentukka diatu.
“Berindik ari nya, kitai deka ngelalau mensia mayuh tauka peranak di kandang menua tu ngambika enda ngaga pengawa nunu chara tebuka, kelebih agi maya musin kemarau,” ku Mahmudin nyemetak.