Palan Servis DUN Repok udah ngagihka bantu ngagai peranak ba Rumah Papit, Sungai Kuap
SARIKEI: Palan Servis Kunsil Nengeri (DUN) Repok udah meri bantu bakul pemakai ngagai 37 pintu ruang bilik ba Rumah Papit, Sungai Kuap, Nyelong Sarikei, kemari.
Bantu nya udah diberi ngagai rumah panjai tu ti udah kena atur nagang pemindah (lockdown) laban ti bisi peranak di genturung pendiau nya positif COVID-19.
Kaban Kunsil Nengeri (ADUN) Repok Dato Sri Huang TIong Sii madahka, atur nagang pemindah ti diberi ngagai peranak ba rumah panjai tu iya nya pengelama 15 hari.
“Proses ‘lockdown’ ba rumah panjai tu udah berengkah dipejalai kena 14 Mac nyentuk 28 Mac ti deka datai.
“Semanjai timpuh tu peranak dia udah diasuh diau ba bilik diri empu lalu enda dikemendar pansut ari bilik.
“Kena nangkup guna ninting hari peranak di rumah panjai tu, raban kitai udah ngasuh Palan Servis DUN Repok ngambika nganjung barang pemakai ngagai peranak kena nangkup guna ninting hari sida,” ku
Huang.
Beserimbai enggau nya mega, Huang udah minta raban ba Palan Servis DUN Repok ngambika seruran bekerejasama enggau ejensi perintah ke bisi kaul enggau peranak ti udah diasuh bejalaika atur nagang pemindah kelebih agi dalam nentuka tetiap pemar ke ditapi sereta guna sida ti tekeruga ulih diputarka enggau manah.
Nitih ku Huang, bepelasarka rikod rumah panjai tu bisi 142 iku peranak.
“Kitai ngarapka peranak di rumah panjai tu ulih besabar lalu ngasika tetiap atur ti udah ditetapka semanjai timpuh ‘lockdown’ tu dipejalaika.
“Tu endang beguna dalam pengawa sereta misyen semua raban ti deka mutuska rentayan pengelekai igi penyakit COVID-19,” ku Huang nyemetak.
Sama bisi dalam program ngagihka bantu bakul pemakai ngagai peranak di rumah panjai tu iya nya Penghulu Huang Tiong Kang, Kapitan Ling Ding Liong sereta sekeda raban ari Palan Servis DUN Repok.