Urung 863 iku nembiak PKS udah ngerejista pulai baru ke kampus
KUCHING: Urung 863 iku nembiak Politeknik Kuching Sarawak (PKS) pulai baru ke kampus sereta ngerejista ba Kolej Kediaman PKS ungkus Fasa 1 Sesi Disember 2020 ti berengkah kemari enggau sehari tu (21 Mac 2021).
Direktor PKS Jamaliah Ahmad madah, semua nembiak nya enda tau enda dikuarantin sereta diseraraka dulu ba Kolej Kediaman sida sebedau ulih sama enggau sesi belajar ngena chara teori enggau praktikal.
Ku iya, nembiak nya deka dibagi ngagai dua raban iya nya ari dalam Sarawak enggau ari Semenanjung, Sabah enggau Labuan.
“Nembiak ari Semenanjung, Sabah enggau Labuan sida deka enda tau enda dikuarantin 14 hari enggau patut swab test, lalu nembiak ari dalam Sarawak deka diseraraka pengelama 10 hari,” ku iya lebuh dikerandau maya ngabas palan pengerejista nembiak ditu.
Nambahka nya Jamaliah madah, PKS beterima kasih ngagai Komiti Mutarka Penusah Ngenyit Nengeri Sarawak laban ti nanggung ungkus makai ngirup nembiak ke enda tau enda dikuarantin Fasa 1.
Nitih ku Jamaliah, atur pengawa nerima penama nembiak ke PKS dipejalaika berenggat sereta dipelabaka tembu kena 15 Mei ke deka datai.
Penama tauka pemulai nembiak ke sekali tu mungkur nembiak Semester 1 - 5 dalam mayuh bidang diploma Sesi Disember 2020 ba PKS.
Nembiak ti bekaul iya nya nembiak Jabatan Kejuruteraan Awam, Jabatan Kejuruteraan Elektrik, Jabatan Kejuruteraan Mekanikal, Jabatan Kejuruteraan Petrokimia, Jabatan Teknologi Maklumat dan Komunikasi enggau Jabatan Perdagangan.
Entara program pelajar diploma iya nya Diploma Kejuruteraan Mekanikal (DKM), Diploma Kejuruteraan Mekanikal (Automotif) DAD, Diploma Teknologi Petrokimia (DTP), Diploma Kejuruteraan Mekanikal (Penyaman Udara dan Penyejukbekuan) DPU, Diploma Geomatik (DGU) enggau Diploma Perkhimdatan Bangunan (DBP.
Maya pengawa pengerejista diatur, staf PKS enggau nembiak dikeingatka terit nitihka prosedur operasyen standard (SOP) baka meresa pengangat tubuh, ngena sengkabung idnung enggau nyawa sereta ngena ai pemeresi jari.
Sama bisi datai Sapit Direktor (Sokongan Akademik) Mohamad Khirudin Amdan.