PH Sarawak tebuka enggau sebarang ubah magi sitak PRN ti deka datai
KUCHING: Pakatan Harapan (PH) Sarawak sedia nerima penemu pasal perambu bukai nyema bisi sebarang ubah bekaul enggau magi sitak ungkup Pengawa Bepilih Nengeri (PRN) ke deka datai.
Chairman PH Sarawak Chong Chieng Jen madah nya berindik ari Kaban Parlimen (MP) Julau Larry Sng ti nyurut diri ari Parti Keadilan Rakyat (PKR) Sarawak bulan Februari tu tadi sereta dipelaba deka bisi ubah ba sekeda sitak dalam PH lebih agi ba Parlimen Julau.
“Sempekat tauka semaya kami pasal magi sitak (pun taun tu) agi enda berubah, tang kami agi tebuka tauka nerima penemu nyema bisi sebarang perambu bukai pasal siti tauka dua, tauka tiga sitak ti engka perambu nya lebih manah ari utai ke udah dipesetuju sebedau tu.
“Nama ti pemadi beguna diatu iya nya ulih berunding baka chara kami ulih nambahka peluang menang PRN ke deka datai.
“Nama pekara ti udah dipesetuju (magi sitak) ulih tiga parti komponen iya nya PKR, Parti Tindakan Demokratik (DAP) enggau Parti Amanah Negara (AMANAH) sebedau tu deka tetap nyadi pekara pemun kami,” ku iya.
Iya mansutka pekara nya ba aum pengarang berita PH Sarawak ti diatur ba Indu Opis DAP Sarawak ditu, kemari.
Kena 2 Januari 2021, Chong ti mega Chairman DAP Sarawak madah PKR deka bediri minta pilih ba 47 sitak, DAP ba 26 sitak enggau AMANAH ba semilan sitak.
Nitih ku iya, PH Sarawak udah sama besetuju bekaul enggau magi 82 sitak Kunsil Nengeri (DUN) ba PRN ke deka datai.
“Atur setujuka pengawa magi sitak tu dikena nentuka tiga parti tu enda berebut tauka beserak ba tiap sitak ti dipelaban tauka diperebutka,” ku iya.
Kelimpah ari nya lebuh ditanya bekaul enggau Larry ti nyurut diri nyadi Chairman PKR Sarawak deka ngeruga penegap PH Sarawak dalam PRN ke deka datai, Chong madahka. pemesai datai enggau badu tang pengawa nengika politik PH enggau parti kompnenan agi tetap.
“Taja pan bisi individu enda entap penemu, bejai enggau betukar parti, tang pengawa negi, visyen enggau misyen politik PH endang agi tetap.
“Kami deka terus negika Sarawak nyadi lebih manah enggau chara megai perintah ti nadai bechiping enggau bisi tanggungpengawa ke penguntung rayat,” ku iya.
Dulu ari nya, Chong mantaika raban baru ungkup komiti PH Sarawak.
Sapit Chairman I ke baru iya nya Kaban Parlimen Miri Dr Michael Teo ari PKR, lalau Sapit Chairman II ke baru iya nya Abang Halil ari Amanah.
Sama bisi dalam komiti baru nya baka Alan Ling nyadi Sekretari; Chiew Chiu Sing (Bendahari); Saifunnizam Sam (Pengari Raban Nembiak), Violet Yong (Pengari Orang Indu); Abg Zulkifli Abg Engkeh (Sekretari Publisiti); Joshua Jabeng (Ketua Biro Pembaharuan Tanah); Leon Jimat Donald (Ketu Biro Pembaharuan Perkhidmatan Awam).
Lalu kaban komiti iya baka Roland Engan, David Wong, Maxwell Rojis, Andri Zulkarnaen, Mohd Fadillah Sabali enggau Kelvin Yii.
“Tu deka nyadi rintai rasmi PH Sarawak ti udah diputuska sereta komiti tu deka ngatur aum bukai dalam dua minggu ke deka datai ti berandauka beberapa aspek ngemaru laban mayuh pekara ti bechiping dalam tusun, polisi enggau struktur iya diatu,” terang Chong.