Peminta betuchuk vaksin ti enda diterima deka dipansik baru
Sekalika sida ti ngaga peminta nya bisi risiko ngagai pengerai tauka bisi salah lebuh ti ngisi pom enggau pekara bukai
“
Taja pia kitai bisi rintai sukung penerima vaksin lalu sapa pan dalam rintai nganti nya deka dipasukka kitai dalam rintai kedua penerima vaksin lebuh penerima keterubah nya enda ulih
” nerima vaksin.
Dr Melvin Chung
Pemesai Pengerai Bagi Menua Bintulu
BINTULU: Sida ti enda diterima peminta betuchuk vaksin COVID-19 deka diperatika baru sekalika nya bisi risiko ngagai pengerai iya tauka bisi salah lebuh ti ngisi pom enggau ke bukai, ku Pemesai Pengerai Bagi Menua Bintulu Dr Melvin Chung.
Ku iya, nyema peminta vaksin tu ditemu kurang risiko ba asil mansik baru nya deka diatur semaya baru ungkup peminta nya.
Ku iya nerang, pengawa nya digaga ngambika enda ngerua vaksin lalu kena ngemenuhjka kuota ti udah ditetapka.
“Taja pia kitai bisi rintai sukung penerima vaksin lalu sapa pan dalam rintai nganti nya deka dipasukka kitai dalam rintai kedua penerima vaksin lebuh penerima keterubah nya enda ulih nerima vaksin,” ku iya lebuh ti ditemu dalam Program Vaksinasi Imunisasi COVID-19 renggat keterubah ti ngaul 1,770 raban terabai menua ba Dewan Sri Kenyalang Universiti Putra Malaysia Kampus Bintulu kemari.
Bekaul vaksinasi Pfizer BioNTech ku iya, penudah 21 hari tuchuk dos keterubah, pengawa meri dos kedua deka digaga ba hari ke-21 nyentuk ke-45 tang timpuh nya ari 21 hari nyentuk hari ke-40.
“Naka diatu, kitai melabaka pengawa meri vaksin nitihka timpuh vaksinasi ke ditetapka kena hari ke 21, nadai penanggul laun lalu semua nya bejalai enggau manah,” ku iya nerang.
“Pengawa meri dos kedua nyangka deka beselisih enggau renggat kedua laban nya digaga sereta nitihka kategori enggau juluk kitai iya nya deka meri vaksin nyentukka 70 peratus sereta ngabiska pengawa meri vaksin tu sebedau bulan Ogos tu,” ku iya nandu.
Lebuh ti ditanya bekaul bansa vaksin ku iya, renggat keterubah tu ngaul pengawa meri dos keterubah enggau kedua iya nya vaksin Pfizer BioNTech lalu pengudahnya renggat kedua kitai melabaka nerima Sinovac.
“Program renggat keterubah siri keterubah ungkup dos kedua kena 27 Mac nyentuka 29 Mac 2021 minggu ti deka datai lalu penerima deka nerima setipikit edigital ti madahka sida udah nerima dua dos tu,” ku iya.
Ku Dr Melvin madah, ungkup program tiga hari renggat keterubah siri keterubah enggau dua tu, pengawa meri vaksin tu kelebih agi ungkup raban Opis Pengerai, Polis DiRaja Malaysia (PDRM), Raban Penyaga Pengelikun Periman (APM), Ejensi Peneritadat Maritim Malaysia (APMM), raban pengemeran palan berubat peribit, farmasi enggau klinik ti semua nya dipasukka nengah semaya ari MySejahtera.
Ku iya, pengawa meri vaksin renggat kedua dipelaba bulan April lalu naka diatu timbal mensia mayuh bekaul program meri vaksin tu manah tang kitai agi begunaka bantu kena ngelakuka nya ngambika mayuh agi ti ngerejista diri kelebih agi di menua pesisir.
Ku iya nambah, ba bagi menua Bintulu bisi ngembuan 14 klinik enggau opis peililih menua ti ulih ngatur pengawa ngerejista penerima vaksin sereta ngarapka penerang tu ulih dipadahka ngagai peranak di menua pesisir kelebih agi ba rumah panjai.
“Tu endang beguna laban kitai enggaika sapa pan di rumah panjai tetinggal ari nerima vaksin lalu naka tu ti berejista semina 40 peratus ari 190,000 peranak Bintulu ti tau ngaga peminta lalu tu minta kitai nambahka pengawa ngerejista vaksin renggat kedua enggau ketiga,” ku iya.