Jelatung Santaba ulih diangkat nyadi sebuah palan eko-dagang temuai
LIMBANG: Jelatung Santaba ba Genturung Pendiau Patiambun ti tebilang enggau pemanah kampung paya bakau ba tebing Sungai Limbang ulih dikemansangka nyadi palan eko-dagang temuai laban ti dipeda sama enggau pemanah rampa menua sebuah sungai di Vietnam.
Menteri Dagang Temuai, Seni enggau Main Asal Malaysia (MOTAC) Datuk Seri Nancy Shukri madahka aktiviti eko-dagang temuai tu deka dikelaku ngambika temuai nyadika Malaysia entara palan ti pemadu manah sereta pilih keterubah kena nemuai.
“Ba Jelatung Santaba Genturung Pendiau Patiambun, kitai ulih ngasaika diri ba Vietnam.
“Ba Vietnam sungai nya mit, ditu (Jelatung Santaba) sungai nya besai, beresi, manah lalu ngembuan produk dagang temuai bukai baka semepat malam enggau Proboscis Monkey,” ku iya lebuh ti ditemu maya ti ngelawa ke Jelatung Santaba ba Genturung Pendiau Patiambun ditu, bedau lama ti udah.
Sama nyempulang iya Sapit Menteri Perengka Pengangkut Datuk Hasbi Habibollah, Menteri Muda Betanam Betupi Moden, Tanah Adat enggau Pemansang Kandang Menua Datuk Dr Abdul Rahman Ismail, Kaban Kunsil Nengeri (ADUN) Batu Danau Paulus Palu Gumbang, Ketuai Sekretari MOTAC Dato Dr Noor Zari Hamat, Ketuai Kunsilor Opis Kaunsil Pelilih Menua Limbang (MDL) Kunsilor Sufian Mohat enggau Ketuai Genturung Pendiau Patiambun Ahmad Mail.
Ku Kaban Parlimen (MP) Batang Sadong nya madah agi, Jelatung Santaba tu ngembuan penyelai kediri empu lalu bisi potensial dikemansangka nyadi produk eko-dagang temuai.
“Jeti Santaba bisi produk ti ulih dibantaika, semina patut dikemanah kena mai temuai nengah bot, bejual asil pengelandik jari enggau pemakai, lalu mega ulih nambahka ekonomi peranak di kandang menua tu,” ku iya.
Ku Nancy nerang, pelin pemansang dagang temuai tu endang engkeman lalu dikerandauka begulai enggau pengari rayat di Limbang.
“Nengah pengawa ngelawa baka tu, kitai ulih meda kediri empu nama ti diperambu nengah kereta kereja.
“Limbang tu ngembuan mayuh kandang menua ti bisi potensial deka dikemansangka nya palan ekodagang temuai,” ku iya.
Jelatung Santaba tu endng sebuah palan dagang temuai ti tebilang ba utara nengeri ti ulih narit penama temuai menua tu enggau menua luar.