Rejista enggau program imunisasi vaksin COVID-19 kena nyaga diri, diri sebilik
MIRI: Peranak di Miri dipinta ngerejista diri enggau program imunisasi vaksin kena nyaga diri enggau orang ti dikesayau ari kena rampit igi penyakit COVID-19, seraya mega kena nyangkal berita selebubu ngapa bekaul pekara nya.
Menteri Muda Dagang Temuai, Seni enggau Main Asal Datuk Sebastian Ting madahka iya nya, nyentuk 17 Mac tu tadi, penyampau sida ti udah ngerejista iya nya nyau deka setengah ari penyampau peranak (ke beumur 18 taun ke atas) ba bagi menua tu.
“Bepelasarka ripot ti diberika Opis Residen Miri, bisi 66,904 individu ke ngerejista enggau program tu nengah aplikasyen MySejahtera lalu 44,687 inidividu ti udah ngerjista enggau chara manual.
“Beserimbai enggau nya, penyampau semua nya bisi 111,591 inidividu ari 258,900 iku ti udah berejista ngmbi bagi dalam program tu,” ku Sebastian nerang.
Iya ke mega ADUN Piasau ngelalau sida ke bedau berejista, ngmbika ngerejista diri kena ngerintai sida sama dalam program tu.
“Kami deka terus minta orang Miri ngambika ngerejista lalu ngarap, kena ujung bulan tu, kitai deka ulih nyapai paling enda 50 peratus ari penyampau peranak ditu,” ku iya nambah.
Kenyau ari program imunisasi tu dipejalai ba selmapur menua kena bulan Feburari tu tadi, perintah udah ngemaruka aplikasyen MySejahtera kena nyendiaka sistem ngerejista ke manah agi ngagai komuniti.
Minggu nyin kemari, pampang SUPP Pujut enggau pampang Krokop mega udah ngambi inisiatif enggau ngemunka aktiviti mantu peranak di kandang menua tu berejista enggau program nya.
Inisiatif tu meri diri sebilik ti lunggar umur tauka sida ke nadai akaun MySejahtera, ngerejista nengah chara ‘online’.
Kod QR deka nyambung peminta ngagai pom nengah chara online lalu kena ngisi penerang bekaul diri sebedau dianjung.
Pemesai ti megai tanggungpengawa deka meda penerang nya, lalu betelefon ngagai peminta kena ngesahka pekara tu.
Pengudah disahka, nya lalu ditusun, disain ketuai komuniti baka Ketuai Genturung Pendiau, Kapitan tauka Tuai Rumah lalu disuaka ngagai Opis Residen ngambika dipasuk ngagai lis orang ti udah berejista.