RM11.78 juta udah dibelanja ungkup projek bumai di Tanjung Purun
Projek nya udah dipejalaika ba tanah mungkur pemesai 88 hektar ngena mayuh bengkah injin
“
Tagit diketau iya nya tujuh tan per hektar nengah nambahka pengawa bumai. Pukul rata asil ke diketau menua
” iya nya lapan tan per hektar.
Chong Mui Sia
Pemesai Opis Betanam Betupi Bagi Menua Kuching
KUCHING: Sepenyampau RM11.78 juta udah dibelanja kenyau ari taun 2017 kena ngemansangka projek bumai di Tanjung Purun, Kampung Stunggang Melayu Lama di Lundu.
Nitihka siti penerang, agih belanja nya nyengkaum RM7.3 juta kena ngaga enggau ngangkatmanah sistem parit enggau infrastruktur entali ai sereta kereja bukai ke bekaul.
Naka ke diatu, projek ti udah dipejalaika nya mungkur pemesai tanah 88 hektar ngena mayuh bengkah injin baka injin kena ngetau,kereban kena mindahka anak padi, ‘power tillers’, pemanchit bekuasa, injin kena ngerekai padi, traktor enggau dron pemanchit.
Sapit Kepala Menteri ke mega Menteri Betanam Betupi Moden, Tanah Adat enggau Pemansang Kandang Menua (MANRED), Datuk Amar Douglas Uggah udah nemuai ngagai taba projek nya kena Hari Minggu nyin
tadi.
Iya disempulang Kaban Kunsil Nengeri Tanjung Datu, Datuk Amar Jamilah Anu, Sekretari Mendam MANRED Edwin Abit enggau Direktor Opis Betanam Betupi Sarawak Dr.Alvin Chai.
Berebak enggau nya,Pemesai Opis Betanam Betupi Bagi Menua Kuching, Chong Mui Sia madah ngagai Uggah ke alai iya udah ngasuh opis nya ngena sistem ngatur pengawa komprehensif ngambika ulih nambahka pengawa bumai taun ini.
“Tagit diketau iya nya tujuh tan per hektar nengah nambahka pengawa bumai.
Pukul rata asil ke diketau menua iya nya lapan tan per hektar,” ku iya.
Chong mega madahka bisi10 bansa padi ditanam dalam projek nya baka padi Mirah, Pandan, Retih, Pulut Cina, Pulut Chelum, MR 219, MR 263, MRQ 76, Black Berry enggau Lombok.
Ba taun 2019,pukul rata asil ke diketau iya nya 4,037 kilogram per hektar. Bisi 75 hektar alai bumai ti mungkur 92 iku orang bumai.
Taun siti nyin tadi, palan bumai dalam projek nya nambah ngagai 88 hektar ti mungkur 96 orang bumai, taja pia asil nya mengkang dipansik.