PETRONAS diansak numbuhka palan kuarantin ungkup staf kompeni nya
BINTULU: Kaban Parlimen Bintulu, Dato’ Seri Tiong King Sing ngansak kompeni gis enggau minyak PETRONAS ditu numbuhka palan kuarantin ungkup staf ti ari baruh kompeni nya, kelebih agi ti datai ari kandang menua luar nyengkaum ari menua tasik.
Ku iya, chara nya ulih ngurangka penyampau rampit COVID-19 ba sida ke gawa ba sektor gis enggau minyak di bagi menua tu kelebih agi staf kontrak ti diambi bekereja di Bintulu.
“Aku ngarapka Petronas berundingka langgur penemu tu laban beratika bisi sekeda kes ti bekaul enggau ejen ti enda nitihka Prosedur Operasyen Standard (SOP) ti terit maya mai pekereja sida ke Bintulu nyentuk ngujungka nyadi pengelekai pandemik COVID-19,” ku iya ba siti penerang berita ditu, kemari.
Pekara tu deka balat agi nyadi enti ejen tauka pekereja pelantar minyak nya empu ngelalaika status pengerai sida nyentuk ke nyadi kes pandemik nya berampit.
Ku Tiong, ulah nya dipeda baka nadai berundingka diri empu enggau orang bukai.
Berebak enggau nya, Tiong meri jaku tangkan ngambika bala ejen nentuka tetiap pekereja ari baruh pegai sida beperesa chulit COVID-19 ba endur sida bekejang tiga hari sebedau lalu udah nya minta permit mansa pelilih menua enggau bagi menua ari balai polis ke besemak.
“Aku ngarap Polis Diraja Malaysia (PDRM) bebendarka beratika pekara tu nyengkaum netapka tetiap iku pekereja mantaika ripot peresa chulit COVID-19 sebedau ngeluarka permit mansa pelilih enggau bagi menua,” ku iya.
Langgur penemu nya ku iya, ukai deka ngenusahka pengemeran gawa ba sektor gis enggau minyak di Bintulu, tang atur proaktif ke patut diambi semua kena nagang pengelekai penyakit nya.
“Tu berindik ari pansik ti dipejalaika Opis Pengerai Bintulu bekaul kes berampit COVID-19 ti nyadi ba pekereja pelantar minyak ti ngenukuka sekeda pesakit ti baru datai di Bintulu berasal ari zon mirah, bisi ati deka ngelalaika status pengerai sida sereta madahka diri udah lama diau di Bintulu,” ku iya.
Ku Tiong, ulah ti nguji ngemulaka status pengerai nya ukai semina ngelubahka kereja raban terabai menua, tang mega ngujungka mensia mayuh ditu tau kena rampit COVID-19.