Servis FPL KK Tudan ngemuntangka pesakit pengambil ubat
MIRI: Urung 500 iku pesakit udah ngerejista diri ngena servis Farmasi Pandu Lalu (FPL) Klinik Pengerai (KK) Tudan ti udah berengkah beroperasyen baru, kemari.
Menteri Perengka Pengangkut Sarawak Datuk Lee Kim Shin madah, servis FPL udah mutarka penanggul dedat ba premis KK Tudan sereta nagang pengelekai pandemik COVID-19.
“KK Tudan antara ke pemadu kisuk ditu ti meri servis ngagai lebih 700 pesakit ninting hari, lalu enggau pemisi FPL, nya ulih ngurangka penedat dalam premis,” ku iya lebuh bejadi FPL KK Tudan ditu, kemari.
ADUN Senadin nya madah, inisiatif FPL mega endang kena nyeliahka pengelekai pandemik COVID-19 kelebih agi ba palan ke dedat, sempit tauka mayuh orang.
“Pesakit tau enda ibuh tama ke dalam premis KK Tudan tang tau ngagai kaunter FPL di luar premis ngambi ubat ninting bulan sida.
“Sida semina mandangka preskripsyen ubat ngagai staf ti gawa maya ngambi ubat, dibandingka enggau sistem ke sebedau tu ke alai pesakit mesti nganti lumur gintir sida.
“Kami meri terima kasih ngagai komuniti enggau NGO ke bekerejasama enggau Sepital Miri ti udah ngemujurka FPL, ti lalu ngemandakka jam pesakit,” ku iya.
FPL iya nya projek Rotary Club of Miri Oil Town, Advocates Association of
Sarawak Miri (AAS Miri) begulai enggau Palan Servis DUN Senadin ke beungkus RM80,000 lalu palan nya nyaup meri RM20,000.
Servis nya beopersyen ninting Hari Satu nyentuk Hari Lima ari pukul 8.30 pagi nyentuk 4.30 lemai, ti meri servis alai ngambi lalah ubat ungkup ninting bulan aja.
Ngenang pasal gaya COVID-19 di Miri, Lee ke mega menteri ti megai tanggungpengawa ba Komiti Mutarka Penusah Ngenyit Bagi Menua (JPBB) Miri madah, kes ulih dikurangka enti semua orang nitihka Prosedur Operasyen Standard (SOP).
“Dua kes ti ditemu berindik ari gempuru sosial enggau ba endur kereja ulih dikurangka enti komuniti majak ngasika
SOP ti ditetapka perintah.
“Enti siku ari ruang bilik nya positif COVID-19, semua sida sebilik nya deka kena magang, baka ke naydi ba sebuah ruang bilik bedau lama udah. Nya alai kami enda ngasuh komuniti ngatur sebarang aktiviti sosial,” ku iya.
Sama b isi maya nya, Menteri Muda Dagang Temuai, Seni enggau Main Asal Datuk Sebastian Ting, Datuk Bandar Adam Yii enggau Tebangkar Perubat Ruang Bilik KK Tudan, Dr Maurice Steve Utap.