Patut bisi siku lutur meri servis ba Klinik Pengerai Nanga Kemalih
JULAU: Kaban Kunsil Nengeri (ADUN) Meluan Rolland Duat Jubin minta ngagai Opis Menteri Pengerai Malaysia (KKM) berundingka deka ngengkahka siku lutur ba Klinik Pengerai Nanga Kemalih.
Nitih ku iya, pekara tu endang beguna ungkup servis pengerai enggau berubat ti endang diguna peranak di kandang menua pesisir.
“Aku minta ngambika KKM berundingka deka ngengkahka siku lutur ba klinik tu ila,” ku iya nerang lebuh ti bejaku ba Program Malaysia Prihatin Pengurusan Pandemik COVID-19 ba Rumah Sang Lasa, Rantau Chire besemak enggau Nanga Kemalih, Ulu Entabai, kemari.
Iya mega ngansak peranak di kandang menua nya ngambika terus ngemeranka 'norma' baru lalu seruran ngasika Prosedur Operasyen Standard (SOP) ti udah ditetapka Komiti Mutarka Penusah Ngenyit Nengeri (JPBN) Sarawak enggau KKM kena mutuska rentayan pandemik COVID-19.
“Tetiap peranak di kandang menua tu patut ngerejista diri nengah MySejahtera tauka Tuai Rumah sida empu kena ngulihka tuchuk vaksin COVID-19. Nya beguna ungkup nyaga diri serta komuniti.
“Sida patut ngulihka tuchuk vaksin enggau enda kakang ati laban tu udah ditemu likun,” ku iya.
Berindik ari nya, Sapit Menteri Pengerai II Datk Aaron Ago Dagang udah ngelimpangka awak ngelawa taba Projek Perambu Nembuka Laluh Kereja Ungkup Klinik Pengerai (Bansa 6) Enggau Kuarters di Nanga Kemalih, Ulu Entabai, Julau, Bagi Menua Sarikei beserimbai enggau program ngelawa kereja iya.
Menija Projek Opis Kandang Menua Tengah Opis Kereja Raya (JKR) Sarawak Ateh Charles Kedu udah meri licha bekaul enggau pemansang sereta status pemadu baru projek ngagai iya sereta raban ti sama enggau iya.
Projek tu udah berengkah dipejalai bulan Disember 2019 lal dipelabaka tembu maya suku ketiga 2021 enggau pemansang fizikal iya nya 70 peratus.
Lebuh tembu ila, klinik tu deka nganti klinik lama ti udah lebih ari kapasiti tikas operasyen, kelimpah meri servis pengerai ke moden agi sereta lantang ngagai peranak di kandang menua ba ngelingi Ulu Entabai.