JPBB Miri ngemunka video dalam empat bansa jaku meransang ngerejista vaksin
MIRI: Komiti Mutarka Penusah Ngenyit Bagi Menua (JPBB) Miri udah ngemunka empat video ari mayuh bansa jaku kena meransang pengawa ngerejista Program Imunisasi COVID-19 Nasional.
Chairman JPBB Miri Abdul Aziz Mohd Yusuf madah, semua empat video promosyen vaksin COVID-19 digaga dalam Jaku Melayu (pengelama 1 minit 12 sikin), Jaku English (pengelama 1 minit 29 sikin), Jaku China (51 sikin) lalu Jaku Iban (55 sikin).
“Semua video nya mantaika empat iku individu ke endang sinonim sereta beguna dalam komuniti ba bagi menua Miri.
“Sida tu iya nya Menteri Perengka Pengangkut Sarawak Datuk Lee Kim Shin, Pakar Berubat AM U56 Sepital Miri Dato Dr. Fam Tem Lom, ex Pemesai Pengerai Miri Dr. Faizul Bin Mansoor sereta ex atlet menua Watson Nyambek,” ku iya.
Aziz ti mega Pemangku Residen Bagi Menua Miri madah munyi nya lebuh ti ngemunka empat video tu pengudah tembu aum JPBB Miri pagi kemari.
Nitih ku iya, video tu iya nya mesej ti mai tuju meri penerang sereta pemereti ati ngagai komuniti di Miri kelebih agi bekaul guna deka ngulihka vaksin COVID19.
Tu mega kena ngerembaika penerang bekaul vaksin nya ti dijangka berengkah diberi ngagai mensia mayuh nengah pengawa meri Vaksin Renggat II enggau Renggat III kena bulan ti deka datai.
“JPBB Miri sekali agi ngelalau mensia mayuh ngambika ngerejista enggau lengkas nengah aplikasyen MySejahtera tauka nengah empat chara bukai baka ti dipadahka JPBB Miri sebedau tu.
“Tu beguna kena ngemuntangka sida ulih diberi vaksin COVID-19 Renggat II enggau Renggat III ti deka datai kena nyeliahka sida ari ti tetinggal,” ku iya nerang.
Mensia mayuh mega dilalau ngambika terus bejejaga lalu seruran ngasika aspel Prosedur Operasyen Standard (SOP) nagang COVID-19 enggau terit.