Perintah Sarawak deka mekuh ngagai juluk nyadi nengeri gadung
Nengah inisiaitif nanam baru pun kayu di kandang endur ti udah ditebang enggau kayu ti jampat tumbuh, ungkup busines produk tembu
KUCHING: Perintah Sarawak deka nanam puku dalam pengawa betanam baru pun kayu di kandang endur ke udah kena tebang pengudah pandemik COVID-19.
“Diatu Opis Kampung Sarawak enggau ejensi benung merambu draf polisi kena kitai, dalam nyapai juluk nyadi nengeri gadung. ”
Datuk Patinggi Abang Johari Tun Openg
Kepala Menteri
Kepala Menteri Datuk Patinggi Abang Johari Tun Openg madahka kandang endur ti udah kena tebang deka ditanam baru enggau pun kayu ti jampat tumbuh lalu ulih dikena ungkup busines produk tembu.
“Diatu Opis Kampung Sarawak enggau ejensi benung merambu draf polisi kena kitai, dalam nyapai juluk nyadi nengeri gadung.
“Polisi kitai iya nya dalam pengawa kitai mansang kitai nentuka kampung terus meruan ti dijaga enggau manah,” ku iya.
Iya madah munyi nya lebuh ti bejaku bejadika pengerami ngintu Hari Kampung Antarabansa 2021 Renggat Nengeri Sarawak ba Taman Tasik Bukit Siol, DBKU ditu kemari.
Dulu dalam jaku pengelalu iya Abang Johari madahka Sarawak iya nya pemeri ti pemadu tinggi iya nya 42 peratus tauka 7.7 hektar ari semua bungkur kampung menua.
Kena nyukung program restorasyen tu, perintah nengeri udah ngemendarka RM62 juta ngagai Opis Kampung Sarawak dalam bejalaika program restorasyen dalam Atur Pemansang Malaysia Lumpar Ke-12 (RMK12).
“Menua ngembuan juluk deka nanam 100 juta pun kayu datai ba taun 2025. Kitai di Sarawak udah nanam 3 juta pun kayu.
“Juuk kitai iya nya ungkup 1 juta hektar kandang endur betanam baru nyentukka taun 2025 ke alai naka diatu lebih ari 500,000 hektar ti udah ditanam,” ku iya nambah.
Dalam pengerembai pekara ti bekaul ku Abang Johari madah, perintah nengeri besetuju ngambika kandang endur Taman Tasik Bukit Siol, DBKU nyadi sebagi agi ari kampung galau pengeraja asal.
Tu reti nya, ku iya, kandang endur tu deka nyadi kandang kampung dalam mengeri ungkup sitak Petra Jaya baka ti bisi ba Stutong.
“Palan tu nyadi kampung galau pengeraja asal enggau bemacham spesies pun kayu ti ditanam nyengkaum buluh.
“Aku ngasaika nyema tu dijaga enggau manah, kandang endur tu deka nyadi manah agi ari Taman Botani FRIM, Kepong di Selangor,” ku iya seraya nambah kandang endur tu ngembuan mayuh pemaik ungkup palan endur begambar.
Ba pengerami tu, Abang Johari mega udah ngemataka pengawa beganti Sempekat Pemereti Ati (MoU) ti udah disain entara Opis Kampung Sarawak enggau Sarawak Energy Berhad, Sime Darby Plantation enggau Universiti Putra Malaysia.
Sama bisi datai Sapit Kepala Menteri Datuk Amar Awang Tengah Ali Hassan, Menteri Muda Pemansang Mengeri enggau Pengeraja Asal Kedua Datu Len Talif Salleh, Direktor Opis Kampung Sarawak Datu Hamden Mohammad sereta bala bukai.