PKPB di Sarawak dilanjar baru berengkah 30 Mac-12 April 2021

KUCHING: Atur Nagang Pemindah Bisi Penetap (PKPB) ba Sarawak dilanjar 14 hari agi berengkah 30 Mac 2021 ngagai 12 April 2021.

Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita kemari madah pemutus nya ditetapka komiti bepelasarka gaya kes COVID-19 ba nengeri tu.

“Pengudah meda enggau mansik gaya kes positif ba Sarawak agi tinggi, JPBNS udah ngemutuska ngelanjarka Atur Nagang Pemindah Bisi Penetap (PKPB) ba Sarawak, berengkah 30 Mac 2021 pukul 12.01 pagi ngagai 12 April 2021 pukul 11.59 malam (14 hari),” ku JPBNS.

Berebak enggau tu, JPBNS mega madahka Atur Nagang Pemindah Diteritka Agi (PKPD) deka dipejalaika ba dua bengkah genturung pendiau ba Pelilih Menua Serian.

Dua buah genturung pendiau ke bekaul iya nya Genturung Pendiau Chupak enggau Genturung Pendiau Batu Gong.

“PKPD (Atur Nagang Pemindah Diteritak Agi) Genturung Pendiau Chupak, Serian berengkah dipejalaika 25 Mac (12.01 pagi) ngagai 7 April 2021 (11.59 malam).

“PKPD Genturung Pendiau Batu Gong, Serian berengkah 26 Mac (12.01 pagi) ngagai 8 April 2021 (11.59 malam),” ku JPBNS.

Kelimpah ari nya, JPBNS mega ngingatka mensia mayuh ngambika ngeripotka pengawa rabat ngagai Opis Pelilih Menua ke semak.

Lalu maya rabat nya mega dilalau ngemeran sereta ngemeratka prosedur operasyen standard (SOP) ke udah ditetapka enggau terit kena nagang pengelekai COVID-19.

“Berindik ari ti tebal agi kes positif COVID-19 bekaul enggau pengerami rama iya nya baka rabat, maya rabat patut diripot sereta dipadahka ngagai Opis Pelilih Menua ke semak sereta nitihka SOP enggau terit sebedau pengawa nya diatur.

“Ketuai bansa enggau ketuai komuniti mega dipinta mantu neritka SOP nya,” ku JPBNS.