Fatimah: Mayuh agi kerejasama dikena mantu ngatur program nyikap diri nuju menua tuai
KUCHING: Mayuh agi orang nyengkaum gerempung volunteer diperansang sama mantu ngatur program ti meri penguntung ngagai raban lunggar umur dikena nyikap nuju menua tuai (ageing country).
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah madahka, Malaysia nuju ngagai siti maya ti dikumbai menua tuai, ti dipelaba penyampau raban lunggar umur ti beumur 60 taun ke atas iya nya 15 peratus pemayuh mensia lebuh manggai taun 2030.
“Nya alai diatu udah datai ba maya ti patut kitai nyikap diri enggau status menua tuai tu.
“Ba menua kitai, perintah udah nyendiaka polisi ungkup raban lunggar umur dikena nentuka atur nyaga pengerai ti manah agi nyengkaum raban lunggar umur ti gerai, produktif ke agi ulih mai penguntung ngagai menua enggau orang tuai bekualiti,” ku iya.
Iya mansutka pekara nya lebuh bejaku maya nemuai ngagai Happy Longevity Welfare Society ti mega sama digulu Menteri Muda Pengelantang Raban Bansa Datuk Francis Harden Hollis enggau Chairman Happy Longevity Welfare Society Annie Chua ditu, kemari.
Berindik ari pekara nya iya amat ngelaluka penumbuh gerempung baka Happy Longevity Welfare ti sama ngemeratka raban raban lunggar umur senentang pengerai, pengingat enggau runding sida.
Ku iya pengawa nya setipak enggu pengeran perintah ti bebendar nyikap diri nuju menua tuai ba taun 2030.
“Kitai ngarap ngambika palan ti baka tu ulih nyungkak ngagai palan aktiviti ungkup raban lunggar umur ti lebih ngemeratka aktiviti ke meri peransang ngagai pengingat enggau runding.
“Kelimpah ari nya setipak enggau pemansang teknologi digital diatu, ke ulih mantu raban lunggar umur ulih sama ngasai sereta nguna teknologi ti mai penguntung ngagai pengerai enggau pengelantang pendiau sida,” ku iya.
Iya madahka Happy Longevity Welfare Society iya nya siti pelasar kena ngerembaika servis opis menteri lebih agi opis ungkup raban ti ditagit.
Kelimpah ari nya Fatimah mega minta barang sapa ti deka numbuhka gerempung volunteer ngambika ngerejista enggau Opis Pengerejista Gerempung (ROS) awakka bulih penguntung ari pekara ti disediaka perintah.
Ku iya, ngerejista enggau ROS sida ulih minta geran ti diberi perintah nengah Opis Pengintu Pengelantang Pendiau dikena bejalaika aktiviti tauka program raban ditagit.