213 kes baru positif COVID-19 dirikodka di Sarawak kemari

KUCHING: Bisi 213 kes baru COVID-19 dirikodka Sarawak, kemari.

Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madahka, nya ngunjungka penyampau semua kes positif COVID-19 ba nengeri tu nambah nyadi 15,176 kes.

Ari 213 kes baru diripotka, bisi 31 iku udah ngayanka tanda enggau bisi tanda rampit COVID-19 maya diperesa.

“Sehari tu (Kemari) bisi 213 kes baru COVID-19 ditemu ba Sarawak. Pelilih Menua ti ngeripotka kes iya nya Pelilih Menua Daerah Bintulu (46), Miri (39), Sibu (35), Kuching (23), Serian (23), Kapit (14), Samarahan(11), Julau (8), Sarikei (6), Sri Aman (6), Limbang (1) enggau Tebedu (1).

“Ari 213 kes baru nya nyengkaum 127 kes asil meresa individu ti bisi kontak ngagai kes positif COVID19 (13 iku bisi tanda); 41 kes asil meresa individu dalam kluster aktif ke udah bisi; 20 kes beperesa bukai ba fasiliti pengerai (empat iku bisi tanda); 15 kes asil meresa individu bisi tanda ba fasiliti pengerai; lima kes bekaul enggau individu pulai ari nengeri bukai dalam Malaysia ti dikategori nyadi kes Import B enggau lima kes bekaul enggau individu pulai ari luar menua (Import A) iya nya ari Papua New Guinea,” ku JPBNS, kemari.

Nambahka nya JPBNS kemari ngeripotka bisi 250 kes baru udah gerai sereta dikemendarka panust ari Sepital Sibu (72), Sepital Miri (49), Sepital Bintulu (48), PKRC Sepital Kapit (28), PKRC Betong (25), Sepital Besai Sarawak (19), Sepital Sarikei (5), PKRC Serian (2), Sepital Sri Aman (1) enggau PKRC Mukah (1).

Nya nyadika penyampau semua kes positif COVID19 ke udah gerai sereta dikemendarka pansut naka kemari bisi 12,351 iku tauka 81.39 peratus ari penyampau semua kes COVID-19 ba Sarawak, ku JPBNS.

Kemari bisi 213 PUI baru udah diripotka enggau nadai PUI ti nganti pemutus makmal.

Kelimpah ari nya, bekaul enggau status nitihka pelilih menua ba Sarawak, kemari Pelilih Menua Tanjung Manis betukar nyadi status Kuning.

“Sehari tu (Kemari), Pelilih Menua Tanjung Manis udah pulai baru nyadi status Kuning ari status Oren pengudah ngerikodka semina 19 kes rampit ba pelilih menua tu dalam timpuh 14 hari ke udah.

“Tu ngujungka penyampau semua pelilih menua ba status Kuning nambah nyadi 17 pelilih menua, lalu pelilih menua ba status Oren nurun nyadi dua pelilih menua,” ku JPBNS.

Lalu 12 pelilih menua bukai agi ba status Mirah enggau semilan pelilih menua bukai agi ba status Gadung.