Kluster Lrg Desa Senadin, Batu Gong dua kluster baru COVID-19 di Sarawak

KUCHING: Opis Pengerai Nengeri Sarawak (JKNS) udah netapka dua agi kluster baru COVID-19 iya nya Kluster Lorong Desa Senadin ba Pelilih Menua Miri enggau Kluster Batu Gong ba Pelilih Menua Serian.

Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madahka, dua kluster baru iya nya kluster komuniti.

“Sehari tu, Opis Pengerai Nengeri udah netapka dua agi kluster baru iya nya ba Pelilih Menua Miri (Kluster Lorong Desa Senadin) enggau Pelilih Menua Serian (Kluster Batu Gong).

“Kluster Lorong Desa Senadin, Miri iya nya siti kluster komuniti ti udah ditemu bekaul enggau sebuah palan pematih maritim ba Lorong Desa Senadin, Lutong ba Pelilih Menua Miri.

“Kluster Batu Gong, Serian iya nya siti kluster komuniti ti udah ditemu bekaul enggau sebuah genturung pendiau Kampung Batu Gong, Pelilih Menua Mit Siburan ba Pelilih Menua Serian,” ku JPBNS, kemari.

Nitih ku penerang JPBNS, Indeks kes Kluster Lorong Desa Senadin, Miri iya nya kes ke-12,919 siku pelatih ba palan pematih nya iya nya peranak menua (Sarawak) beumur 22 taun ti ditemu nengah pengawa meresa individu bisi tanda kena 15 Mac 2021 ba Sepital Miri.

Indeks kes dipelaba udah dirampit nengah kontak kasual ari komuniti entara 1 ngagai 14 Mac 2021.

“Naka ke diatu, kluster tu semina mungkur dua buah pelilih menua iya nya Pelilih Menua Miri enggau Pelilih Menua Mukah.

“Asil ari pansik silik enggau pengawa nyidi kes enggau aktif ngagai kontak semak enggau kontak kasual, (naka kemari) ari sepenyampau 173 individu udah diperesa bisi 30 kes positif COVID-19 nyengkaum kes indeks; 59 individu negatif enggau 84 kena agi nganti pemutus.

“Semua 30 kes positif COVID-19 udah dipasukka ba PKRC Miri (29 iku) enggau PKRC Mukah (siku) ngambika diperubat sereta diseraraka,” ku JPBNS.

Bekaul enggau Kluster Batu Gong, Serian, ku JPBNS, indeks kes iya nya kes ke-14,157 siku indu peranak menua (Sarawak) beumur 46 taun ti ditemu nengah pengawa meresa individu bisi tanda kena 19 Mac 2021 ba Klinik Pengerai Siburan.

“Kes ti gawa kediri tu dipelabaka dirampit nengah rampit komuniti. Rampit tu udah ngelekai ngagai individu bukai ba genturung pendiau nya nengah pengawa begulai enggau kontak semak,” ku JPBNS.

Asil ari pansik silik enggau pengawa nyidi kes ngena chara aktif ngagai diri sebilik, kotak semak enggau kontak kasual ngagai indeks kes bisi 496 individu udah diperesa.

Ari penyampau semua nya (496 individu), bisi 50 kes udah ditemu positif COVID19 nyengkaum kes indkes; 146 kes negatif enggau 300 kes agi nganti pemutus, ku JPBNS.

Lalu semua 50 kes positif COVID-19 nya udah dibai ke Sepital Serian enggau dipasukka ba PKRC Serian ngambika diperubat sereta diserara.

Enggau penambah dua kluster baru kemari ngujungka penyampau semua kluster COVID-19 agi aktif ba nengeri tu bisi 33 kluster.

Ari penyampau nya (33 kluster), bisi lapan kluster ngeripotka nambah kes, lalu 25 kluster agi nadai nambah kes.