SPR patut nerangka pengawa ngerejista pengundi automatik ba umur 18 taun: Dr Sim
KUCHING: Menteri Kaunsil Kandang Menua enggau Pengawa Berumah Dato Dri Dr Sim Kui Hian (gambar) nanya kebuah Opis Pengawa Bepilih (SPR) ti bedau besedia bejalaika pengawa ngerejista pengundi automatik enggau pengulih ngundi ba umur 18 taun.
Iya madahka, dua renggat nya iya nya Parlimen Perintah Besai enggau perintah nengeri udah ngemendar sereta ngenukuka undang-undang, ti ngemendarka sida ti beumur 18 taun dipilih enggau nyadi pemilih tauka pengundi maya pengawa bepilih diatur.
“Tang diatu SPR madah pengawa nyikap napi pekara nya agi apin digaga.
“Kami ukai orang ti pandai tauka nemu dalam ngatur data tauka integrasyen engka SPR (Opis Pengawa Bepilih) patut nerangka enggau lenak tauka silik agi bakani nya ulih nyadi,” ku iya nengah Facebook iya, kemari.
Dr Sim ti mega Presiden Parti Rakyat Sarawak (SUPP) madah tang ba SUPP mega Gabungan Parti Sarawak (GPS), sida deka terus ngangkatka pengelantang pendiau sereta aspirasyen semua bansa enggau renggat umur ba Sarawak.
Kena Hari Empat (Khamis) diripotka pengawa ngerejista pengundi automatik enggau pengulih nyadi pengundi ba umur 18 taun dipelaba semina ulih dipejalaika 1 September taun baru.
Chairman SPR, Datuk Abdul Ghani Salleh madahka sida iya patut ngembuan ulah ti realistik enggau pemansang sereta gaya ti nyadi ba menua diatu baka ti ditemu orang mayuh agi dalam timpuh Atur Nagang Pemindah (PKP) dikena nagang pengelekai COVID-19.
Tu mega, ku iya, gaya ke nyadi nya ngeruga perambu enggau pengawa SPR nyikap diri ngemujurka pengawa ngerejista pengundi automatik sereta undi 18, ke sebedau tu dipelaba dipejalaika bulan Julai ke deka datai.
“Nya alai, pengawa ngerejista pengundi automatik enggau undi 18 dipelaba ulih dipejalaika pengudah 1 September 2022 pengudah mansik baru semua pekara ti nagang tauka nanggul enggau isu ti ngeruga perambu sereta pengawa nyikap diri tumu SPR.
“SPR komited bejalaika dua pekara nya baka ti dikemendarka ba Parlimen ngambika dikeamatka maya Pengawa Bepilih Besai Menua Ke-15 (PRU-15), lebuh manggai 2023 belalauka Perkara 55(3) Perlembagaan,” ku iya.