Raban Nembiak PBB ngarapka SPR lengkas bejalaika Undi 18
KUCHING: Raban Nembiak Parti Pesaka Bumiputera Bersatu (PBB) ngarapka Opis Pengawa Bepilih (SPR) ulih lengkas sereta bejalaika Undi 18 nitihka timpuh ba Pengawa Bepilih Besai Menua (PRU) enggau Pengawa Bepilih Nengeri (PRN) ke deka datai.
Ketuai Raban Nembiak PBB Gerald Rentap Jabu madahka laban ba Sarawak, Rang Undang-Undang dikena ngubah Artikel 16 Konstitusyen Nengeri kena nurunka umur pemadu biak ulih nyadi pengari rayat ari 21 taun ngagai 18 taun udah dikemendar tauka ditetapka Kunsil Nengeri (DUN) kena 12 November taun nyin kemari.
Lalu ba ubah Konstitusyen Perintah Besai bekaul enggau Pengerejista Pemilih Automatik, ku iya, nurunka umur ulih nyadi pengundi pemadu biak ngagai 18 taun sereta ba umur nya rayat Malaysia ulih mangku pengawa ba opis perintah ti udah dikemendarka selubang sepenemu ba Parlimen kena 16 Julai 2019.
“Kami (Raban Nembiak PBB) ngarapka SPR ulih enggau lengkas bejalaika Undi 18 baka ti udah ditimpuhka ba Pengawa Bepilih Besai Menua (PRU) enggau Pengawa Bepilih Nengeri (PRN) ke deka datai.
“Perintah Gabungan Parti Sarawak (GPS) amat ngelaluka penyereta raban nembiak dalam politik enggau mega dalam proses demokrasi. Pemerat enggau aspirasyen raban nembiak amat beguna kena nyaga Sarawak jemah ila.
“Raban nembiak patut dikemendarka ngena hak demokrasi sida nitihka Konstitusyen Perintah Besai ke udah diubah,” ku iya ti mega Kaban Kunsil Nengeri (ADUN) Layar.
Penerang nya penerang begulai enggau bala kaban Raban Nembiak PBB ke bukai baka ADUN Tupong Fazzrudin Abdul Rahman, ADUN Sadong Jaya Aidel Lariwoo, ADUN Serembu Miro Simoh, ADUN Machan Allan Siden Gramong enggau Kaban Parlimen Sibuti Lukanisman Awang Sauni.
Tambah mega ku Gerald, raban nembiak diatu dikelingi penerang endang udah tuai runding, bepenemu manah pasal gaya politik diatu kelimpah ari nyadi tulang belakang menua sereta penemu sida patut dipendingka.
“Kitai begunaka sida (raban nembiak) sama ngambi bagi dalam proses demokrasi, nempa pengerindu dalam politik kena nyikap sida ngaga pemutus kritikal nyadi pemesai jemah ila,” ku iya.
Apin lama Suruhanjaya Pilihan Raya (SPR) madah nangguhka dulu pengerejista pemilih automatik (AVR) ti diturunka ari umur 21 taun ngagai 18 taun, seraya madah deka ulih dikeamat tauka dipejalaika kena 1 September 2022 iya nya pemadu tumu.