Lebih 9,000 dos vaksin Sinovac deka diberi ngagai raban terabai menua
KUCHING: Lebih 9,000 dos vaksin Sinovac ke diatu udah datai di Sarawak bedau lama ti udah deka diberi ngagai raban terabai menua ti nadai ko-morbid lalu ti beumur 60 taun ke baruh.
Menteri Kandang Menua enggau Pengawa Berumah Dato Sri Dr Sim Kui Hian madah, tu iya nya kriteria ti ditetapka Opis Menteri Pengerai ngagai penerima vaksin Sinovac naka diatu.
“Taja pia, kitai udah madah tumu ngagai opis menteri bekaul chap vaksin ti dipiih kami tang polisi ke bisi seruran berubah ninting maya,” ku iya maya program kaunter ngerejista vaksinasi COVID-19 di Pasar Batu 7 ditu kemari.
Dr Sim madah, strategi perintah nengeri diatu iya nya ngulihka enggau naka pemayuh dos vaksin PfizerBioNTech ungkup mensia mayuh kelimpah betapi enggau pemas nyimpan vaksin ba tikas penyelap -70 darjah celcius lebuh ti mai ke kandang menua pesisir.
“Pia mega, kitai patut ngulihka jaku lalau ari Tim Penyanding Penemu Vaksin COVID-19 Sarawak lalu nyema bisi vaksin bukai ke bisi kena bulan Jun tauka Julai, perintah nengeri udah tentu deka mansik pekara nya,” ku iya.
Iya bepenemu bekal vaksin di selampur dunya deka nambah ari bulan April nyentukka Jun sebedau bisi enggau mayuh kena bulan Julai.
Dr Sim ngelalau iya nya pemerat ngerikodka tikas pengerejista vaksin ti tinggi dalam komuniti Sarawak laban enggau chara tu ulih bulih mayuh agi dos vaksin ari Putrajaya.
Ku iya madah, Kawasan Rukun Tetangga (KRT) enggau opis kaunsil kandang menua disuruh mantu nambahka tikas pengerejista ti tinggi agi dalam mensia mayuh sekalika nengah aplikasyen MySejahtera tauka nengah kaunter berejista.
Dr Sim nyemetak madahka 70 peratus peranak di nengeri tu patut kena vaksin, lalu reti nya 99 peratus ari sida tu beumur 18 taun ke atas lalu mesti dituchuk.
“Tuju vaksinasi enda baka ungkup individualistik. Pengudah chukup orang tauka 70 peratus populasi udah kena vaksin, pengelekai igi penyakit COVID-19 ulih diketuka lalu mutasyen virus ulih diputarka. Tu mih tuju keterubah nya,” ku iya nerang.
Nyema pengawa tu enda mujur, Dr Sim madahka vaksin ti dituchuk ke dalam tubuh siku orang nya nyangka nadai agi beguna kena ngelaban virus ti nyau bermutasyen.
Diripot sebedau tu iya nya 600,000 iku di nengeri tu udah berejista ungkup vaksinasi ngena chara manual lalu 500,000 agi berejista nengah aplikasyen MySejahtera ti diarika urung setengah ari populasyen ti ditemu deka dituchuk.
Taja pia, Dr Sim nyemetak madahka perintah Sarawak agi pechaya deka nuchuk vaksin 2.2 juta iku di nengeri tu kena bulan Ogos lalu Sarawak ulih ngulihka kediri ari kompeni ti ngaga vaksin baka Pfizer ngmbika ulih bulih mayuh agi vaksin.
Ungkup selampur menua, ku Dr Sim madah, bisi 600,000 dos vaksin Sinovac deka datai bulan nyin ila, 3.7 juta dos vaksin Pfizer-BioNTech deka datai ungkup bulan April nyentukka Jun lalu 12 juta agi dos vaksin Pfizer-BioNTech ungkup timpuh Julai nyentuk September.
“Tu mih kebuah lapa kitai minta perintah besai meri vaksin enggau enda bechiping lalu nyema sida enda ulih meri penyampau dos vaksin ti dikedeka kitai, kitai madah ngagai sida kitai deka meli vaksin nya kediri,” ku iya.
Sama bisi Kaban Kunsil Nengeri (ADUN) Batu Kitang Lo Khere Chiang ti mega Chairman MPP enggau Sapit Chairman MPP Dato Ahmad Ibrahim.